Inspektorati Qendror i Punës, në zbatim të vendimit të ministrit të Ministrisë së Punës, Familjes dhe Vlerave të Luftës Çlirimtare (MPFVLÇ) dhe në përputhje me mandatin e tij ligjor, ka njoftuar se ndërmarrë aksion të jashtëzakonshëm inspektues në sektorët me rrezikshmëri të lartë, në të gjithë territorin e Republikës së Kosovës, ku ka ndaluar 126 punime.

Inspektorati Qendror i Punës ka thënë se raporti i prezantuar paraqet rezultatet përmbledhëse të inspektimeve, të realizuara në kuadër të këtij aksioni.

Në përfundim të aksionit, të gjitha subjektet ndaj të cilave është shqiptuar masa e ndalimit të punimeve, procesohen automatikisht në Gjykatën për Kundërvajtje, përkatësisht për shkeljet e konstatuara.

“Procesi i riinspektimeve do të zhvillohet në ditët në vijim të aksionit, sipas afateve kohore të përcaktuara nga inspektorët për eliminimin e parregullsive. Eliminimi i parregullsive nënkupton procesin kur subjekti i inspektuar ka ndërmarrë veprime për përmirësimin e gjendjes së SSHP-së. Rastet e proceduara në polici nënkuptojnë rastet kur punëkryerësit/investitorët kanë vazhduar punimet në kantier në kundërshtim me vendimin e inspektorëve për ndalim të punimeve, si dhe dëmtimin e shiritit ndalues. Rastet e paraqitura në polici nuk barazohen numerikisht në tabelë, pasi ato janë raste ndaj punëdhënësve/investitorëve që kanë në fuqi vendimin për ndalim të punimeve”, ka njoftuar MPFVLÇ-ja.