Një tërmet i fuqishëm goditi rajonin e rëndësishëm minerar të Kilit, Antofagasta, të hënën pasdite, duke ndërprerë operacionet në disa miniera, por autoritetet thanë se nuk pati viktima ose dëme të mëdha në infrastrukturën kyçe.

Tërmeti me magnitudë 6.9 ballë goditi zemrën e prodhuesit më të madh të bakrit në botë, megjithëse kompanitë e mëdha të minierave raportuan vetëm dëme të kufizuara. Shërbimi Gjeologjik i SHBA-së tha se epiqendra ishte në një thellësi prej 109 km.

Kompania shtetërore minerare e Kilit, Codelco, ka pezulluar disa operacione për shkak të dukshmërisë së reduktuar në minierat e saj dhe ndërprerjeve të energjisë elektrike në disa zona, tha një zëdhënës i kompanisë.

Kompanitë minerare BHP dhe Antofagasta thanë se operacionet e tyre nuk u prekën nga tërmeti.

Ricardo Munizaga, drejtor rajonal i agjencisë së emergjencave të Kilit, SENAPRED, i tha kanalit lokal 24 Horas se tërmeti shkaktoi rrëshqitje toke në disa vende prodhimi, por se nuk pati raportime për lëndime ose incidente të tjera të mëdha.

Banorët e qytetit të Calama, ku banojnë një numër i madh minatorësh, mbetën pa energji elektrike dhe furnizimi i tyre me ujë u ndërpre.

Kompanitë minerare kanë aktivizuar protokollet e emergjencës dhe kanë pezulluar përkohësisht disa operacione për të inspektuar objektet e tyre.

Një nga imazhet tregon pasojat e tërmetit, me produkte të hedhura nga raftet në një nga dyqanet.