Kryeshefja ekzekutive e Postës së Kosovës, Nora Rraci, u prit në takim nga ministrja e Industrisë, Ndërmarrësisë, Tregtisë dhe Inovacionit,  Mimoza Kusari-Lila.

Gjatë takimit u diskutua për forcimin e bashkëpunimit ndërinstitucional dhe për mundësitë e mbështetjes së përbashkët në funksion të zhvillimit ekonomik dhe avancimit të shërbimeve të Postës së Kosovës.

Në fokus të veçantë ishte roli i Postës së Kosovës në mbështetjen e bizneseve, veçanërisht të ndërmarrjeve të vogla dhe të mesme, përmes shërbimeve postare dhe logjistike.

Në këtë drejtim, u vlerësua rëndësia e bashkëpunimit me Ministrinë për krijimin e mundësive të reja dhe për avancimin e mëtejshëm të shërbimeve që ofron Posta e Kosovës.

Në shenjë respekti dhe mirënjohjeje për bashkëpunimin, kryeshefja ekzekutive, Nora Rraci, i dhuroi ministres Kusari-Lila një dhuratë simbolike nga programi filatelik i Postës së Kosovës, “Bukuritë Natyrore të Kosovës”.

Posta e Kosovës mbetet e përkushtuar për forcimin e bashkëpunimit me institucionet publike dhe për zhvillimin e shërbimeve që kontribuojnë në mbështetjen e qytetarëve dhe bizneseve në vend.