Pas vrasjeve të fundit në Gjilan, kryetari i kësaj komune, Alban Hyseni, ka kërkuar shtimin e kontrolleve policore për armëmbajtjen pa leje dhe rritjen e pranisë së policisë në shkolla.

Përmes një postimi në “Facebook”, Hyseni ka bërë me dije se këto kërkesa i ka paraqitur në mbledhjen urgjente të Këshillit Komunal për Siguri në Bashkësi, ku ka marrë pjesë edhe zëvendësministri i Punëve të Brendshme, Enver Dugolli.

Sipas Hysenit, gjatë takimit, përfaqësuesit e institucioneve janë informuar për detajet e rasteve të fundit tragjike nga drejtori rajonal i Policisë dhe komandanti i stacionit policor.

Ai ka thënë se Komuna e Gjilanit ka ofruar bashkëpunim të plotë me organet e rendit, ndërsa përfaqësuesit institucionalë janë zotuar për angazhim më të madh me qëllim të parandalimit të ngjarjeve të tilla.

“Mbrojtja e jetës së qytetarëve tanë mbetet prioriteti ynë kryesor dhe do të punojmë me vendosmëri për të garantuar qetësinë dhe rendin publik në çdo pjesë të Gjilanit”, ka shkruar Hyseni.