Me aktgjykimin e së martës, më 17 nëntor, për pengim të drejtësisë, Specialja në Hagë përmbylli çështjen e gjashtë në shkallën e parë.
Gjykata Speciale ruan ‘rekordin’: Gjeti fajtor në secilin rast të ngritur nga Prokuroria
Të gjashta kanë përfunduar me të paktën një dënim. Në to është vendosur për fajësinë e 15 personave të ndryshëm.
Katërmbëdhjetë janë shpallur fajtorë për të paktën një akuzë. Hashim Thaçi është dënuar në dy çështje të veçanta.
As pafajësia e Isni Kilajt nuk e ndryshoi këtë bilanc sipas çështjeve. Në të njëjtin proces, katër të bashkakuzuarit e tij u dënuan.
Ish-kryetari i Malishevës u shpall i pafajshëm për të dyja akuzat, duke u bërë personi i parë plotësisht i pafajshëm në historinë e kësaj gjykate.
Thaçi u dënua me 17 muaj burgim, Bashkim Smakaj dhe Fadil Fazliu me nga 12 muaj, ndërsa Hajredin Kuçi me një muaj me kusht.
Për Smakajn dhe Fazliun, dënimet u konsideruan të shlyera për shkak të kohës së kaluar në paraburgim.
Kuçit iu caktua periudhë njëvjeçare gjatë së cilës nuk duhet të kryejë vepër tjetër penale. Thaçi do t’i vuajë 17 muajt veças, sipas gjykatës, nga dënimi për krime lufte.
Gjashtë çështje, të gjitha me dënime
Aktgjykimi i parë u shpall më 18 maj 2022, kundër drejtuesve të OVL-UÇK-së, Hysni Gucati dhe Nasim Haradinaj.
Ata u dënuan me nga katër vjet e gjysmë për pengim të personave zyrtarë, frikësim gjatë procedurës penale dhe shkelje të fshehtësisë së procedurës.
Më 16 dhjetor 2022, Salih Mustafa mori 26 vjet burgim për krime lufte. Pjetër Shala u dënua me 18 vjet më 16 korrik 2024.
Më 4 shkurt 2025, Sabit Januzi dhe Ismet Bahtijari u dënuan me nga dy vjet, ndërsa Haxhi Shala me tre.
Të tre kishin pranuar fajësinë për pengim të personave zyrtarë dhe frikësim gjatë procedurës penale, përmes marrëveshjeve me Prokurorinë.
Çështja kundër Haxhi Shalës fillimisht ishte e veçantë. Ajo u bashkua me çështjen kundër Januzit dhe Bahtijarit në shkurt 2024.
Më 16 shtator 2026, Thaçi dhe Jakup Krasniqi u dënuan me nga 25 vjet, Kadri Veseli me 18 dhe Rexhep Selimi me 13.
Të katër u shpallën fajtorë për krime lufte dhe të pafajshëm për akuzat për krime kundër njerëzimit.
Apeli ul dënimet, pa dhënë pafajësi të plotë
Në tri çështjet ku janë shqyrtuar ankesat kundër aktgjykimeve dënuese, dënimet janë ulur. Asnjëri nga të dënuarit nuk është shpallur plotësisht i pafajshëm.
Megjithatë, Apeli ka rrëzuar pjesërisht fajësinë. Gucati dhe Haradinaj u shpallën të pafajshëm për një pikë të aktakuzës.
Dënimet e tyre u ulën në nga katër vjet e tre muaj, më 2 shkurt 2023.
Mustafës iu ul dënimi në 22 vjet, në dhjetor 2023. Pas kthimit të çështjes nga Supremeja, Apeli shqiptoi 15 vjet, në shtator 2024.
Pjetër Shalës iu ul dënimi nga 18 në 13 vjet, në korrik 2025.
Apeli rrëzoi konstatimet e fajësisë për torturimin e pesë personave dhe ndalimin arbitrar të dy personave, duke mbajtur fajësinë lidhur me viktima të tjera.
Gjykata nuk i ka pranuar gjithmonë akuzat në tërësi. Në çështjen kundër katër ish-krerëve, Prokuroria kishte kërkuar nga 45 vjet për secilin, për tërësinë e akuzave.
Në çështjen për pengim të drejtësisë, ajo kishte kërkuar gjashtë vjet për Thaçin. Edhe këtu pati pafajësi të pjesshme për të dhe Kuçin.
Dallimi te pafajësitë individuale
Në tri çështjet e Speciales për krime lufte, të gjashtë të akuzuarit janë dënuar. Aktgjykimi ndaj katër ish-krerëve është i shkallës së parë.
Tribunali për ish-Jugosllavinë gjykoi gjithashtu gjashtë ish-pjesëtarë të UÇK-së për krime lufte, por katër prej tyre përfunduan plotësisht të pafajshëm.
Ata ishin Fatmir Limaj, Isak Musliu, Ramush Haradinaj dhe Idriz Balaj. Haradin Bala u dënua me 13 vjet, ndërsa Lahi Brahimaj me gjashtë.
Edhe të dyja çështjet fillestare të Tribunalit prodhuan të paktën një dënim. Dallimi shfaqet te numri i personave të shpallur plotësisht të pafajshëm.
Brahimaj u shpall i pafajshëm për akuzat e rigjykimit më 2012, por dënimi i tij i mëparshëm gjashtëvjeçar, i konfirmuar në apel, mbeti në fuqi.



