Bayerni interesohet për Grudën, Leipzigu vendos çmimin e çmendur
Brajan Gruda po kalon një periudhë të shkëlqyer te RB Leipzig, ndërsa paraqitjet e tij në ndeshjet e para me Kombëtaren e Gjermanisë kanë rritur ndjeshëm interesimin për të.
Sipas gazetës gjermane “Bild”, Leipzigu nuk do ta shqyrtonte shitjen e 21-vjeçarit gjatë verës së ardhshme, përveç nëse do të vinte një ofertë jashtëzakonisht e lartë.
Klubi gjerman raportohet se do të kërkonte një shumë që i afrohet 100 milionë eurove për ta lejuar largimin e tij.
Në mesin e klubeve të interesuara është edhe Bayern Munich. Kampioni rekord i Gjermanisë po e përcjell nga afër zhvillimin e futbollistit dhe vlerëson veçanërisht aftësinë e tij për të luajtur në disa pozita në repartin ofensiv, si në të dy krahët, ashtu edhe pas sulmuesit.
Megjithatë, situata kontraktuale e Grudës i jep Leipzigut një pozitë të favorshme në negociata.
Ai aktualisht është i huazuar nga Brighton & Hove Albion, por, sipas “Bild”, detyrimi për blerjen e tij mund të aktivizohet që në fillim të vitit 2027, nëse futbollisti regjistron të paktën tri paraqitje në Bundesligë gjatë atij viti.
Leipzigu kishte paguar një milion euro për huazimin në shkurt të vitit 2026, ndërsa për blerjen përfundimtare do t’i paguante Brightonit edhe 25 milionë euro.
Pas aktivizimit të marrëveshjes, Gruda pritet të ketë kontratë me klubin gjerman deri në vitin 2031. Për më tepër, kontrata nuk përmban klauzolë lirimi, duke bërë që Leipzigu të mos jetë nën presion për ta shitur.
Kjo do të thotë se Bayerni, nëse dëshiron ta transferojë talentin gjerman, mund të përballet me një operacion që kushton afër 100 milionë euro.



