Zëvendësministri i Arsimit, i Shkencës, i Teknologjisë dhe i Inovacionit (MAShTI), Dukagjin Pupovci, ka bërë me dije të premten se, bazuar në të dhënat e Inspektoratit të Arsimit, në të gjitha shkollat e Republikës së Kosovës është duke u punuar sipas skenarit ‘Rikthimi’, siç parasheh vendimi i qeverisë.

Pupovci ka shprehur përkushtimin e Ministrisë së Arsimit për normalizimin e plotë të procesit mësimor në të gjitha nivelet e sistemit të arsimit dhe ka ftuar të gjitha palët për respektimin e masave për kontrollin, parandalimin dhe luftimin e pandemisë Covid-19.

Ai ka theksuar se, sipas këtij vendimi, procesi mësimor edukativ në institucionet e arsimit parauniversitar të të gjitha niveleve, si dhe në qendrat e qëndrimit ditor, zhvillohet me orar të rregullt dhe me prani fizike, nën mbështetjen, monitorimin dhe mbikëqyrjen aktive nga task forcat komunale dhe institucionale.

Ndërkaq procesi mësimor në institucionet publike dhe private të arsimit të lartë, si dhe në institucionet aftësuese dhe të arsimit joformal, zhvillohet me prani fizike me kushtin që grupet mbi 50 persona të akomodohen në jo më shumë se 50 për qind të hapësirës.

Zëvendësministri Pupovci ka folur edhe për hapjen e konkursit për ndarjen e bursave për studentët e universiteteve publike në programet bachelor dhe master për vitin akademik 2021-2022, ku fondi i përgjithshëm për këto bursa është 1 milion euro. Ai ka theksuar se konkursi do të jetë i hapur nga data 25 tetor deri më 8 nëntor 2021 në orën 16:00 dhe të drejtë aplikimi kanë të gjithë studentët nga të gjitha fushat e studimit.

Pupovci, po ashtu, bëri me dije se MAShTI ka publikuar edhe konkursin për bursa për nxënësit e shkollave të mesme të komuniteteve rom, ashkali dhe egjiptian.

Këto bursa kanë pasur ndikim pozitiv në rritjen e pjesëmarrjes së këtyre komuniteteve në arsimin e mesëm të lartë.

“Konkursi do të jetë i hapur deri më 5 nëntor, ndërsa do të jepen gjithsej 500 bursa”, ka deklaruar ai.

Pupovci është përgjigjur edhe në interesimin e gazetarëve në lidhje me ecurinë e procesit të përzgjedhjes së drejtorëve në institucionet edukativo-arsimore në Komunën e Prishtinës, duke thënë se inspektorati është detyruar të bëjë kallëzim penal ndaj komunës duke qenë se nuk është përfillur rekomandimi për anulim të konkursit.