Ministri i Shëndetësisë (MSh), Rifat Latifi, ka pritur të enjten në takim ambasadoren e Luksemburgut, Natacha Gomes, me të cilën ka biseduar për thellimin e bashkëpunimit në mes të dy vendeve.

Në këtë takim, ministri Latifi ka shprehur falënderimin e tij të veçantë për ndihmën e dhënë nga Luksemburgu për përmirësimin e sektorit të shëndetësisë deri më tani, si dhe e ka njoftuar ambasadoren Gomes për gjendjen e tanishme, planet dhe prioritetet e Ministrisë së Shëndetësisë.

Temë tjetër e diskutimit ishte mbajtja e takimit të përbashkët me të gjithë donatorët ekzistues dhe ata potencialë në fushën e shëndetësisë në Kosovë, ku do të shpalosen planet afatgjate të Ministrisë së Shëndetësisë për transformimin e sektorit shëndetësor në vendin tonë.

Në këtë takim është diskutuar edhe për menaxhimin e situatës epidemiologjike në vend dhe përmirësimit të saj, por u theksua nevoja që vaksinimi të vazhdojë si e vetmja rrugë për t’u mbrojtur kundër Covid-19.

Ndërsa ambasadorja e Luksemburgut, Natacha Gomes, e ka njoftuar ministrin Latifi për ndihmën që shteti i saj ka dhënë për sektorin e shëndetësisë e Kosovës, projektet për të ardhmen.

Latifi dhe Gomes janë dakorduar për një vizitë të ministrit të Shëndetësisë së Luksemburgut në Kosovë.