Kamionë të ngarkuar me karburant hynë në Gaza ditën e hënë më 8 gusht pas një armëpushimi të ndërmjetësuar nga Egjipti midis Izraelit dhe militantëve të Xhihadit Islamik, duke rritur kështu shpresat se konflikti që la dhjetëra palestinezë të vdekur tashmë është drejt fundit.

Një gazetar i “AFP”-së në pikëkalimin e mallrave për në Gazën jugore pa kamionë të ngarkuar me karburant që hynë në enklavën palestineze, duke i dhënë fund një mungese që kishte bërë që stacioni i vetëm i energjisë atje të mbyllej nga dita e shtunë.

Armëpushimi ka hyrë në fuqi mbrëmjen e së dielës, për t’i dhënë fund dhunës që zgjaste prej 3 ditësh mes ushtrisë izraelite dhe militantëve palestinezë në Gaza. Pasi hyri në fuqi, armëpushimi i ndërmjetësuar nga Egjipti është respektuar nga të dyja palët, pavarësisht të shtënave sporadike në orët e para të tij.

Të paktën 44 persona janë vrarë në sulmet e fundit të ushtrisë izraelitë në Gaza, 15 prej të cilëve fëmijë, në përplasjen më të dhunshme mes palëve që prej majit të vitit të kaluar. Udhëheqësit e ShBA-së dhe të Kombeve të Bashkuara vlerësuan arritjen e armëpushimit dhe bënë thirrje për respektimin e tij.

Presidenti amerikan, Joe Biden, ka kërkuar gjithashtu që të vijojnë furnizimet me karburante dhe ndihma humanitare në Gaza.

Dhuna e fundit ka filluar me sulmet izraelite në vendet në Rripin e Gazës, për të cilat ushtria e saj ka thënë se po u përgjigjej kërcënimeve nga një grup militant. Ajo është pasuar me ditë tensionesh pasi Izraeli ka arrestuar një anëtar të lartë të Xhihadit Islamik në Bregun Perëndimor.

Organizata e Xhihadit Islamik është në linjë me Hamasin, por shpesh vepron në mënyrë të pavarur.

Hamasi ka zhvilluar katër luftëra me Izraelin që kur mori kontrollin e Gazës në vitin 2007-të, përfshi konfliktin në maj të vitit të kaluar.

Izraeli ka thënë se ishte e nevojshme të fillonte një operacion “parandalues” kundër Xhihadit Islamik, ndërsa zyrtari diplomatik tha se grupi kishte planifikuar një sulm me snajper ose me raketa antitank.

Ushtria izraelite vrau dy udhëheqës të lartë të Xhihadit Islamik në Gaza, Taysir al-Jabari dhe Khaled Mansour.

Zyrtari i lartë diplomatik izraelit tha se Xhihadit Islamik i është dhënë “një goditje shumë e rëndë”, e cila “i kishte kthyer ata dekada prapa”.