ADEM GASHI

BALLIN LART

Majave t’Ballkanit shtrihen re e mjegull

E nuk lënë të shihet as syri nën vetull,

Ik e zeza e parë, vjen e zeza tjetër

Shkon njëra robëri, kthen robëri e vjetër.

Po një Nanë e madhe mes futës e territ

Ia sjell Kosovës vetë dritën e diellit,

E na i ndez shkëndijat n’çdo oxhak e vatër

O zogjtë e lirisë ç’na i bëri me flatër.

Ti je orëmira, ti je vetë lavdia

S’të përkuli burgu, s’të shembi stuhia,

Ballin lart o trim, i fjalës, i besës

Mendja jot’e ndritur dritare e shpresës.

Mu në flakë të luftës një zemër e madhe

Bëhet za jehone o për djemtë në male,

Ta marrë bota vesh, ti ngrihesh e flet

Lirisë së atdheut iu bëre profet.

Ti je orëmira, ti je vetë lavdia

S’të përkuli mosha, s’të shembi stuhia,

Ballin lart o trim, i fjalës, i besës

Mendja jot’e ndritur dritare e shpresës.

_______________________________

Prangat dhe kafazi s’t’u ndanë Bacalok

Nga Burgu Qendror në Goli Otok,

Djalëri e djegur, pjekuri prej burri

Njëzet e tetë vjet qëndrestar si guri.

Shpjegim i autorit:

Ky është teksti im për Kantatë për kor, recitator dhe orkestër simfonike, kompozuar nga Valton Beqiri,

dhënë premierë në Akademinë Solemne me rastin e 80-vjetorit të lindjes së veprimtarit Adem Demaçi,

Interpretuar nga Kori dhe Orkestra Simfonike e Filarmonisë së Kosovës, me dirigjent Baki Jasharin. (Strofa e fundit recitohet midis kantatës).