Nga përfaqësuesja tek impelementimi i VAR-it dhe projektet e ardhshme. Presidenti i Federatës së Futbollit të Kosovës, Agim Ademi, analizon futbollin e Kosovës gjatë vitit 2021 në një intervistë për “KosovaPress” që, pavarësisht prej vështirësive që solli pandemia, ai mendon se ka pasur rezultate të dukshme.

Përfaqësuesja e Kosovës pati një vit me rezultate zhgënjyese çka çoi edhe në ndërprerjen e bashkëpunimit në mes të FFK-së dhe trajnerit zviceran Bernard Challandes. Ademi mendon se ish-trajneri i ka dhënë shumë Kosovës, ndërsa nuk pati fat me dëmtimet e lojtarëve.

“Nga lëndimi i Arbër Zenelit asnjëherë nuk kemi mundur të jemi kompaktë dhe komplet ekipi i cili ka qenë i përcaktuar të jetë në 11-shën e parë. Arbër Zeneli është parë që vlen shumë në ekipin tonë. Pastaj ndryshimi i futbollistëve kryesorë, ndërrimi i ekipeve duke bërë kontrata të tjera që kanë shkuar në ekipe të tjera dhe ndërrimi i sistemit të lojës ka bërë që këta futbollistë të mos jenë në gjendje të mirë. Unë e falënderoj Challandesin për punën që e ka bërë sepse një trajner i cili bëhet kampion për herën e parë në Ligën e Kombeve për ne nuk ka qenë rezultat edhe i vogël, pastaj 14 ndeshje pa asnjë humbje nuk është lehtë të bëhen. E kam konsideruar një punë që e ka bërë të zellshme, prandaj e kam duruar deri në momentin e fundit, deri kur erdhi momenti që thjesht u desh me u nda me Challandesin për faktin se menduam që nuk kishte çfarë të jepte më shumë në këtë ekip”, ka deklaruar Ademi, i cili ka konfirmuar se ndarja me Challandesin ishte miqësore.

“Ndarja ka qenë miqësore dhe e ka pasur të qartë edhe Challandesin sepse është njeri me përvojë dhe e ka parë që unë e kam tejkaluar edhe pjesën e pritshmërisë deri në fund dhe ai, përveç kësaj, ma ka njohur si të drejtë dhe një falënderim e kam pasur që ju keni pritur deri në momentin e fundit sepse ndoshta me dëshirë ose me format të futbollit është dashur pak më herët të ndahemi me atë, por e kemi pritur edhe disa ndeshje dhe në fund erdhi çasti që me Challandesin ndarja ka pasur të ndodhë, pavarësisht a do t’i kishte fituar edhe këto ndeshje apo do t’i kishte humbur, ndarja ka pasur të ndodhte gjithsesi sepse ne po kërkojmë diçka tjetër tani e tutje, diçka më shumë sepse mendoj që me këtë gjeneratë që e kemi ne mund ta kualifikojmë Kosovën dhe duhet ta kualifikojmë. Me çdo trajner që bëj kontratë sigurisht që kërkojmë rezultate sepse Kosova e ka kohën e rezultateve, e ka kohën e kualifikimeve”, u shpreh Ademi.

Trajneri i ri nuk është përzgjedhur ende dhe kjo, sipas Ademit, nuk do të bëhet deri në muajin mars.

“Fillimisht duhet të jetë një trajner punëtor, e dyta që e njeh mentalitetin tonë dhe i njeh shumicën e lojtarëve, pastaj është edhe çështja ekonomike si kriter dhe natyrisht që marrëveshjet me ta do t’i bëjmë në formatin e ri që bëhen. Rezultate gjithsesi kërkojmë sepse nuk ka me çdo kusht asnjë trajner. Nuk besoj që mund të jetë një botë që mund ta garantojë kualifikimin sepse në futboll nuk ka asgjë të qindpërqindtë, por duhet punuar për të shkuar deri atje, por të paktën objektivat tona janë për kualifikim dhe duhet ta bëjë punën për të qenë një ekip kualifikues e jo një ekip vetëm sa për të qëndruar në këtë grup”, ka shtuar Ademi.

Elementet e kërkuara nga drejtuesit e federatës nuk do të thotë se nuk mund të gjenden edhe te një trajner vendor dhe se Ademi thotë se ka ëndërr që një ditë ta emërojë një trajner kosovar në krye të ekipit kombëtar. Duke iu rikthyer futbollit kosovar, 2021-shin Ademi e cilëson vit të vështirë, por jo pa rezultate.

“Fillimisht një vit i vështirë për shkak të pandemisë, por jam shumë i lumtur që ka përfunduar gjithçka në rregull dhe madje mund të them që sivjet e kemi ngritur edhe nivelin e garave, por edhe të organizimit edhe të financimit të investimeve dhe të gjitha. Përkundër krejt kësaj, shfrytëzoj rastin ta falënderoj UEFA-n dhe FIFA-n të cilët na kanë ndihmuar, sidomos UEFA-n nga ‘hat-trick’ i cili është komision që bën investime në projekte të cilat i kanë federatat, po ashtu edhe sponsorët tanë. Kemi arritur që ta mbajmë gjallë futbollin ose ta mbajmë në nivelin e duhur duke pasur parasysh që barrën më të madhe e kanë pasur sponsorët e klubeve ose investitorët e klubeve. Ndoshta diku ka pasur disa çalime, por gjithsesi e përgjithshmja është shumë e mirë për vetë faktin se garat janë zhvilluar dhe po zhvillohen në mënyrën më të mirë të mundshme. Pra mund të them që është një vit, përkundër pandemisë, një vit i suksesshëm i futbollit të Kosovës në të gjitha kategoritë”, ka deklaruar Ademi.

Implementimi i teknologjisë VAR në Superligën e Kosovës ishte padyshim një nga arritjet më të mëdha të vitit 2021 dhe se për këtë projekt, i pari i FFK-së ndihet krenar. Ai thotë se shumë shpejt mund të shohim një ekip të VAR-it të Kosovës në gara ndërkombëtare.

“E kemi bërë më së shpejti dhe është si shembull në UEFA edhe në FIFA që për herë të parë është bërë një VAR kaq shpejt dhe madje i suksesshëm dhe me shumë sukses, do të thotë që është bërë me të gjitha konditat dhe të gjitha normat që bëhet një VAR në botë. Jo vetëm që jemi të parët, por jemi prej pak shteteve që e kemi bërë për kaq kohë. Nuk është se krejt shtetet e botës ose krejt federatat e kanë VAR-in edhe pse kushtueshmëria e tij ka qenë jashtëzakonisht e madhe për federatën tonë, por gjithsesi i falënderoj shumë që rimbursimin dhe pagesa e të gjitha shpenzimeve që janë bërë dhe kushtueshmëria e këtij VAR-i e ka bërë FIFA me shumë e plotë që rrallëherë ia bën ndonjë federate. Edhe është treguar i rezultatshëm sigurisht dhe po tregohet i rezultatshëm dhe përveç që e kanë marrë me seriozitet, mund të them që shumica prej tyre e kanë perfeksionuar punën e tyre dhe shumë lehtë mund ta shohim në Kampionatin Botëror që tani në Katar një ekip i VAR-it të Kosovës që do të jetë në garat ndërkombëtare, siç vijnë ekipet e tjera në Kosovë”, ka deklaruar i pari i FFK-së.

Por, VAR-i nuk do të jetë lëvizja e fundit sa i përket digjitalizimit të futbollit kosovar. Ademi zbulon se do të vazhdohet edhe më tutje në këtë drejtim aq sa edhe këpucët e lojtarëve dhe topat në stërvitje të digjitalizohen për të krijuar një databazë për efektivitetin e punës së lojtarëve.

“Ne i kemi bërë katapultat, i kemi dërguar nëpër klube, e kanë mundësinë ta shohin veten futbollistët se sa e kanë kapacitetin. Pas këtyre do të vijnë katapultat në këpucë të lojës me të cilat do ta shohim precizitetin ose prekshmërinë se sa herë e kontakton topin një futbollist. Pas kësaj, faza e fundit është edhe topat, sigurisht që do të jenë në stërvitje për të parë precizitetin dhe shpejtësinë e goditjes të secilit futbollist”, ka thënë Ademi, i cili bëri me dije se Federata e Futbollit e Kosovës i ka përfunduar të gjitha projektet e planifikuara gjatë vitit 2021, derisa ka shtuar se në këtë rrugë do të vazhdohet edhe në vitin 2022 ku do të realizohen shumë investime në infrastrukture, duke përmendur edhe ndërtimin e një kampi tjetër stërvitor për të rinjtë si dhe një punë të madhe për rritjen e cilësisë të kampionatit vendor.