Gentrit Kadrolli

Kemi dëgjuar shpeshherë që e gjithë ajo çfarë klientët duan është që të jenë të respektuar, të mos diskriminohen por edhe që të jenë të mirëkuptuar nga ana e atyre që ju shërbejnë. Këto tri elemente, fatkeqësisht, për një pjesë të konsiderueshme të bizneseve në vendin tonë mbeten ende edhe sot kërkesa të tyre elementare gjë që nuk do të duhej të ishin. Në ditët e sotme, ndodh që ende stafit shërbyes të klientëve t’i mbahen trajnime të përsëritura se si të respektohet klienti, se si të kuptohet ai dhe se si të mos vërehen në sy të klientit si diskriminues ndaj tij. Shumë e drejtë

Por!
Të dimë se si t’i respektojmë klientët dhe t’i bëjmë të kuptojnë se qëllimi nuk është t’i diskriminojmë ata, janë aftësi shumë të rëndësishme por të pamjaftueshme për qëndrueshmërinë e biznesit dhe realizimit të një shitje në mënyrën më të mirë të mundshme nëse nuk ju bashkëngjiten edhe aftësitë profesionale

Ajo çka klientët duan por nuk duan ta thonë

Nga disa studime të mëparshme që janë bërë në këtë drejtim, del që në momentin e hyrjes së klientit brenda në një biznes, emocioni i tij blerës rritet deri në 30%. Pra, emocioni i tij blerës ka filluar të aktivizohet por nuk varet e gjitha prej tij se a do të përfundojë i “blershëm”. Nevojitet ndihma e faktorit njeri, apo thënë më ndryshe e stafit shitës të biznesit që të përfundohet blerja. Përpos elementeve të lartcekura të cilat janë shumë të vlefshme, tani nevojiten pikërisht ato aftësi profesionale të cilat do e bëjnë klientin të blejë. Dëshira e klientëve është që të blejnë, por arsyet që ata frikohen të realizojnë blerje mund të jenë të ndryshme nga e kaluara e tyre kurse në anën tjetër frika e tyre rritet edhe më shumë kur stafi shërbyes, respektivisht shitësit bien në kurthin e 7-të të ligjit të xhunglës së biznesit të blerjes dhe shitjes, i cili ligj thotë që nëse klienti e vëren që shitësi me çdo kusht dëshiron të shesë produktin e tij, ai nuk do e blejë atë. Ajo çka klientët duan por nuk ua thonë është: kur klientit nuk i përshtatet një produkt nga mënyra e funksionit të atij produkti, ai kërkon alternativa të tjera dhe jo të bëhemi të shtangur në vend, ajo çfarë klientët duan por nuk ua thonë është kur ata kanë vërejtjet e tyre rreth çmimit të produktit, ne nëpërmjet njohjes së produktit tonë t’i tregojmë vlerat e produktit dhe përfitimet që do t’ia sjellë klientit ai produkt kurse çmimi të mbetet në mes të të dyjave, që do të thotë çmimi të jetë i barasvlershëm, sipas tyre, me vlerat dhe përfitimet që do t’i ketë klienti nga ai produkt. Ajo çka klientët duan por nuk ua thonë është që edhe nëse kanë vendosur të bëjnë shëtitje siç bëjnë shpesh nëpër butiqe apo qendra tregtare, është e domosdoshme t’u bëhet e qartë që jemi aty në shërbim edhe të atyre që vetëm kanë dalë për të hulumtuar/krahasuar produktet.
Ajo çka klientët duan por nuk ua thonë, është që çdo element që diskutohet të jetë i konfirmuar dhe jo të dalë e kundërta kur të bëhet një përmbledhje pothuajse në fund pak para se të realizohet blerja. Ajo çka klientët duan por nuk ua thonë, është që të mos ngelemi te një opsion, por t’i ofrohen dy zgjidhje kurse nëse dëshirojmë të forcojmë mendimin e klientit për njërin produkt t’i ofrojmë tri zgjedhje.
Ajo çfarë klientët duan por nuk ua thonë, është që edhe nëse të refuzojnë në fillim, apo thjeshtë përgjigjja e tyre është jo nuk mundem, refuzimi për stafin shitës nuk do duhej të nënkuptohej që nuk bën të vazhdohet më tutje por që nënkupton ende paqartësi për klientin dhe ka nevojë për dhënien e shpjegimeve shtesë për ta.
Ajo çka klientët duan por nuk ua thonë, është që edhe pse blerja është realizuar, jo të harrohet ai klient derisa të vijë dhe të blejë prapë, por ai klient pas blerjes të përcillet apo të pyetet qoftë fizikisht, përmes email-it apo telefonit, sa është i kënaqur me blerjen e realizuar dhe njëkohësisht t’i tregohet për produkte tjera të cilat do t’i përshtateshin dhe jo që të mos dëgjohen kurrë më me ta.
Këto elemente dhe shumë të tjera të papërmendura i konsideroj shumë me rëndësi për klientin dhe në veçanti për biznesin të cilat do t’i ndihmonin në qëndrueshmërinë dhe vazhdimësinë e tij.