Gjykata e Apelit e ka vendosur drejtësinë në vend. Ajo ka vërtetuar vendimin e Gjykatës Themelore të Prishtinës që e kishte liruar nga të gjitha akuzat KEDS-in në rastin e njehsorëve Kohler.

“Të njëjtën kohë, Gjykata e Apelit ka liruar nga të gjitha akuzat edhe zyrtarin e KEDS-it, z. Avni Alidemaj, duke vërtetuar se gjithçka ndaj tij ishte e pabazuar. Gjykata e Apelit ka vërtetuar gjithashtu se edhe ankesa e Prokurorisë ishte e pabazuar për z. Alidemaj. Gjykata vlerëson se asnjëra nga provat nuk ka vërtetuar se i akuzuari ka kryer vepër penale për të cilën është akuzuar dhe shpallur fajtor në vendimin e Gjykatës së shkallës së parë”, thuhet në vendim.

Konstatimi i Gjykatës shkon tutje, duke hequr çdo dilemë dhe brengë të konsumatorëve të thirrur si dëshmitarë, pasi nuk është dëmtuar asnjë nga ta.

“Askush nga dëshmitarët e thirrur si të dëmtuar nuk janë dëmtuar nga vendosja e njehsorëve elektrikë”, konstatohet në vendim.

“KEDS e mirëpret vendimin e Gjykatës së Apelit pasi e dërgoi drejtësinë në vend. Triumfi i drejtësisë është një satisfaksion moral si për KEDS-in ashtu edhe për z. Alidemaj dhe familjen e tij. Nga vendimi paraprak i Gjykatës Themelore dhe nga aktakuza e pabazuar e Prokurorisë, si KEDS-it ashtu edhe Alidemajt i është bërë dëmtim i rëndë i reputacionit. Ai, gjatë gjithë karrierës së tij ka treguar integritet të lartë moral, për çka vazhdimisht ka mbajtur pozita të larta menaxheriale në kompani”, është  thënë në njoftimin e KEDS-it.

/Epoka e re/