Martin Braithwaite ka thënë se Xavi Hernandez e ka siguruar atë se do të ketë një rol të rëndësishëm në skuadër kur të rikuperohet nga lëndimi, i cili e ka mbajtur atë jashtë fushës që nga shtatori.

Danezi po rikuperohet gradualisht nga një dëmtim në gju, i cili kërkoi ndërhyrje kirurgjikale dhe ai ka besim se trajneri i ri i Barcelonës do ta ketë në planet e tij për pjesën e mbetur të sezonit.

“Tani është një çështje për t’u kthyer së shpejti, por unë do të kem një rol të rëndësishëm kur të kthehem”, tha Braithwaite për TV3.

“Kam folur me Xavi. Ai është i qartë për atë që dëshiron të bëjë dhe çfarë dëshiron të ndryshojë. Ai e di se si dëshiron të luajë, dhe kjo e bën gjithçka shumë të qartë. Do të jetë shumë emocionuese.”

Braithwaite iu nënshtrua një operacioni në mes të shtatorit pasi pësoi një dëmtim patellofemoral në gjurin e majtë dhe ai pritet të jetë në gjendje të rikthehet në stërvitje pas disa javësh, shkruan Marca. “Gjithçka po ecën mirë, po shkon shumë mirë rikuperimi”, shtoi ai.