Ish-ambasadorja e Kosovës në ShBA dhe nënkryetarja e Kuvendit nga radhët e PDK-së, Vlora Çitaku, i është kundërpërgjigjur kryeministrit në detyrë, Albin Kurti, i cili ka thënë se Kosova nuk është prishur me Amerikën, por kanë vetëm dallime dhe se opozita është duke e stërmadhuar këtë çështje.

Çitaku ka thënë për “RTV21” se Kurti është duke jetuar në një univers paralel, pasi siç ka theksuar ajo, raportet mes Kosovës dhe ShBA-së janë në pikën më të ulët për fatin e qeverisë në detyrë.

“Kam përshtypjen që z. Kurti po jeton në një univers paralel. S’ka asgjë me të rëndë që i ka ndodhur Kosovës tani e 25 vjet liri sesa vendimi i ShBA-së për pezullim të dialogut strategjik dhe kjo s’është një vërejtje apo qëndrim yni që e bëjmë më dëshirë. Ne kemi mjaft tema që ta kritikojmë z. Kurti dhe asnjëherë nuk do doja që të më jepej mundësia as mua e askujt në Kosovë që të kritikoj një kryeministër të Kosovës për raportet me ShBA-në. Situata në të cilën jemi është një situatë tërësisht e paimagjinueshme, një territor i pashkelur dhe mund të shndërrohet në një situatë potencialisht të rrezikshme. Kjo çka ka ndodhur ditët e fundit është formalizm i një situatë që ka ekzistuar tani e 5 vite. Në një moment të caktuar gjatë administratës të z. Biden u patën anuluar vizitat e  ministrave të qeverisë tani e 5 vjet këmba e kryeministrit të Kosovës nuk ka shkelur në Shtëpinë e Bardhë… Pastaj më thuani kur ka ndodhur të kalojë një kohë kaq e gjatë pa një vizitë të ndonjë delegacioni të lartë në Kosovë? Raportet fatkeqësisht janë në pikën më të ulët të mundshme”, ka thënë Çitaku