Zyrtarë të Komisionit Qendror të Zgjedhjeve të Kosovës, të shoqëruar nga Policia e Kosovës, kanë hyrë në ndërtesën e komunës së Zubin Potokut.

Më herët gjatë ditës së sotme është njoftuar se oficerët do të hyjnë në zyra për të pasur akses në listat zgjedhore në veri.

“Kosova Online” ka raportuar se depërtimi ka ndodhur rreth mesditës dhe se kanë rënë dy shpërthime.

I njëjti portal, referuar informacioneve nga terreni, bën të ditur se punonjësit e KQZ-së kanë ndërruar bravat pasi kanë thyer dyert e zyrave në bashki.

Sirena që ka rënë ka zgjatur për disa minuta dhe mësohet se qytetarët janë mërzitur shumë.

Siç ka konfirmuar për portalin “Nova.rs” një qytetar nga Zubin Potoku, në një moment para ndërtesës së komunës kanë arritur pesë vetura, tre prej të cilave xhipa të njësive speciale dhe dy automjete të rregullta policore.

Në momentin që efektivët e KQZ-së po largoheshin nga komuna, forcat speciale kanë zbritur nga automjetet e tyre dhe janë siguruar që të mos ndodhin incidente të mëdha.

Më pas ka rënë sirena e alarmit.

Menjëherë pas kësaj, forcat speciale dhe zyrtarët janë larguar nga kjo komunë.

Portali “Nova.rs” ka tentuar të kontaktojë me drejtuesit e kësaj komune, por deri në publikimin e këtij teksti askush nuk iu përgjigj thirrjeve.