Një grua dhe djali i saj, 5-vjeçar humbën jetën të shtunën si pasojë e përmbytjeve në Pejë.

Dritan Ademi, cili ka humbur djalin dhe gruan rrëfeu për “Euronews Albania” se ka qenë ora 21:50 kur ai sapo kishte dalë nga dushi. Nuk ka kaluar shumë kohë kur uji ka marrë para gjithçka në shtëpinë e tyre, siç ka treguar ai.

“Fëmijët i kam kapur në dorë, unë njërin, babi mori vajzën e vogël, shoqja kapi djalin që tashmë nuk është, s’di të ta shpjegoj më shumë, jam munduar t’i shpëtoj të gjithë, pastaj na zuri dhe korrenti, aty e kam humbur komplet ekuilibrin dhe s’kam ditur as ku jam. Për 30 sekonda u mbush gjithë shtëpia me ujë”, ka thënë Ademi.

Sipas Dritanit, nëse nuk do të ishte për korrentin mund të kishin shpëtuar të gjithë. Ai vet ka lëndime bashkë me djalin e madh. Vajza fatmirësisht ka shpëtuar pa u lënduar.

Ndërkaq, Dritani ka thënë se për tri herë kishte mundur ta shpëtonte të shoqen, por herën e fundit kur kishte kthyer kokën atë e kishte marrë rrjedha dhe është gjetur tri ndërtesa më tej e vdekur.

Ai vet për 3 orë e gjysmë kishte qëndruar duke u mbajtur pas një hekuri, gjë që i ka sjellë jo pak shqetësime shëndetësore.