Kosova është bërë vendi i dytë me shumicë myslimane që miraton definicionin e antisemitizmit të Aleancës Ndërkombëtare të Përkujtimit të Holokaustit (IHRA), një organizatë kjo ndërqeveritare, duke iu bashkuar kështu 43 vendeve të tjera.

Vendi i Evropës Juglindore ka miratuar të enjten, më 8 qershor, rezolutën për miratimin e përkufizimit të përcaktuar nga IHRA.

Siç raporton “FoxNews”, vendimi është bërë me dije në “Twitter” nga e ngarkuara me punë e Kosovës në Izrael, Ines Demiri.

IHRA është e vetmja organizatë ndërqeveritare e mandatuar të fokusohet vetëm në çështjet e lidhura me Holokaustin dhe e ka përcaktuar antisemitizmin si një “perceptim të caktuar të hebrenjve”, duke përfshirë urrejtjen retorike dhe fizike ndaj hebrenjve.

“Antisemitizmi është një perceptim i caktuar ndaj hebrenjve, i cili mund të shprehet si urrejtje ndaj hebrenjve. Manifestimet retorike dhe fizike të antisemitizmit janë të drejtuara ndaj individëve hebrenj ose johebrenj dhe/ose pronës së tyre, ndaj institucioneve të komunitetit hebre dhe objekteve fetare”, është thënë në faqen e internetit të IHRA.

Ambasadorja e Izraelit në Kosovë, Tammy Ziv, ka falënderuar deputetët e Kuvendit për vendimin, duke ndarë përkushtimin e vendit “për të afruar dy vendet dhe popujt tanë”.

“Dua të falënderoj 79 deputetët e të gjitha partive në pushtet dhe opozitë në Kuvendin e Republikës së Kosovës që sot njëzëri votuan dhe miratuan përkufizimin e punës të IHRA-s për antisemitizmin. Ne mbetemi të përkushtuar për afrimin e dy vendeve dhe popujve tanë”, ka shkruar ajo në “Twitter”.

Në mars 2021, Kosova i ka quar edhe më tej marrëdhëniet e saj me Izraelin kur vendi hapi ambasadën në Jerusalem. Veprimi ishte i kontrovers, pasi ishte vendi i parë evropian që hapi një ambasadë në qytetin e diskutueshëm, statusi i të cilit është në thelb të konfliktit izraelito-palestinez.

Ndërsa Demiriq e ka mbrojtur këtë përpjekje, duke thënë se ishte “nderi më i madh” i jetës së saj.

Kosova ka ndjekur Shtetet e Bashkuara dhe Guatemalën në hapjen e ambasadave në Jerusalem. /Klankosova