Hakerët publikojnë të dhënat personale të Edi Ramës

27 tetor 22:27

Në postimin e radhës në faqen “Homeland Justice” janë publikuar hyrje-daljet dhe letërnjoftimet e kreut të qeverisë shqiptare, Edi Rama.

Materiali i publikuar është shoqëruar edhe me një mesazh: “Zoti kryeministër i Shqipërisë, a i keni treguar popullit tuaj se taksat që ata paguajnë përdoren për të strehuar terroristët e MEK në Durrës? A po iu jepet shqiptarëve njësoj tokë, shtëpi, ushqim dhe karburant falas”, shkruan në mesazhin e publikuar nga hakerët në “Homeland Justice”.

“Euronews Albania” raportoi se materiali i publikuar këtë të enjte është identik me ato të publikuara më herët nga hakerët; hyrje-daljet e zyrtarëve të lartë të shtetit shqiptar, ku këtë radhë janë hyrje-daljet në vite të kryeministrit Edi Rama dhe letërnjoftimet me të dhënat personale.

Është i njëjti material konfidencial i publikuar më herët për ish-kreun e policisë së shtetit, Gledis Nano dhe kreun e SHISH, Helidon Bendo.

Publikimi i radhës vjen në vazhdën e publikimeve të mëhershme të të dhënave konfidenciale të nxjerra nga sistemet e institucioneve shqiptare.

Më herët hakerët kanë publikuar lista të tjera, të cilat kishin në shënjestër punonjës të Policisë së Shtetit.

Që prej vitit 2021, Shqipëria ka rënë pre e sulmeve kibernetike. Një sulm kibernetik u shënua më 15 korrik të këtij viti që bllokoi të gjitha faqet zyrtare shtetërore dhe platforma e shërbimeve online e-Albania.

Ndërkohë, më 14 shtator u sulmua sistemi TIMS në të gjitha pikat kufitare të vendit. Për këto sulme Shqipëria ka fajësuar Iranin dhe ka ndërprerë marrëdhëniet diplomatike me këtë shtet.

Lajme të sponsorizuara

Të fundit
Presidentja e Kosovës Vjosa Osmani, ka qëndruar në “Shtëpinë e…