Ish ministri i Punëve të Jashtme, Skender Hyseni ka drejtuar kritika ndaj të ashtuquajturit “Grupi i Tiranës” në Lëvizjen Vetëvendosje, duke thënë se kryetari i LDK-së, Lumir Abdixhiku ka bërë mirë që e ka riaktualizuar tendencën e këtij “grupi” për “qëndrime antiamerikane e antiperëndimore”.

Hyseni në një postim në “Facebook”, ka shkruar se grup po dikton politikat qeverisëse në Kosovë.

“Ka kohë që i ashtuquajturi ‘Grupi i Tiranës’ përpos politikave të VV-së dikton edhe politikat qeverisëse në Kosovë. Krijimi dhe etablimi i politikave anti-amerikane dhe anti-perëndimore duket të jetë misioni i këtij ‘Grupi’ që ka për qellim vënien e Kosovës në raporte konfrontuese me SHBA-të dhe BE-në. Diçka që kishte filluar diku në vitin 2015, duket se është konsoliduar fort në politikat partiake të VV-së dhe ato të Qeverisë Kurti. Abdixhiku bëri mirë që e riaktualizoi këtë tendencë. Është detyrë e forcave politike opozitare në Kosovë të mos qëndrojnë indiferent ndaj këtyre përpjekjeve dhe politikave të këtij ‘Grupi’”, ka shkruar Hyseni.