Këshilli për Mbrojtjen e të Drejtave dhe Lirive të Njeriut (KMDLNj) në Mitrovicë është duke përcjell zhvillimin e ngjarjeve në Mitrovicën e Veriut.

Sipas KMDLNj-së, në veri nuk ka kushte të mbahen zgjedhjet.

“Që nga dita e shpalljes së këtyre zgjedhjeve u vunë në veprim strukturat paralele dhe paramilitare për të penguar këto zgjedhje përmes frikësimit të votuesve të mundshëm si dhe kandidatëve, përfaqësues të subjekteve politike apo kandidatë të pavarur të cilët u tërhoqën nga gara. Në garë mbetën subjektet politike shqiptare, me kandidatë të tyre e që paraqesin minoritet elektoral e që nuk e përcakton rezultatin përfundimtar dhe real të pushtetit lokal. Sidomos kohëve të fundit janë aktivizuar forcat që zbatojnë dhunë psikike dhe fizike ndaj atyre që kundërshtojnë Partinë Paramilitare Politike, Listën Serbe, e cila, në emër të ‘mbrojtjes’ së interesave të serbëve angazhohen të zbatojnë politikat destabilizuese të Serbisë në Kosovë. Janë shpeshtuar hudhja e mjeteve plasëse që rrezikojnë, jetën, sigurinë dhe pronën e qytetarëve të atyre komunave me qëllim të krijimit të kushteve penguese për mbajtje të zgjedhjeve”.

“Nëse të gjitha këto merren parasysh sikur që pjesa dërrmuese e votuesve të nacionalitetit serbë po i bojkotojnë këto zgjedhje, KMDLNj e vlerëson se nuk ka kushte elementare të mbahen zgjedhjet e shpallura nga presidentja e Kosovës. Raportet nga KMDLNj në Mitrovicë rekomandojnë që këto zgjedhje të mos mbahen dhe të shtyhen për një kohë më të përshtatshme aq më parë që askush nuk mund të garantojë sigurinë për votuesit sikur edhe vendet ku duhet të mbahen këto zgjedhje”, është theksuar në reagimin e KMDLNj-së.

Sipas KMDLNj-së, në zgjedhje votohet për të siguruar një përfaqësim politik që garanton plotësimin e kushteve dhe nevojave për qytetarët, pa iu kërcënuar liria e votës dhe pa u dhunuar vullneti i votuesit pavarësisht përkatësisë politike, etnike, moshore, racore të moshës dhe të tjera e, në rrethanat aktuale këto kushte nuk janë plotësuar.

“Madje, në këtë tensionim të kurdisur të situatës së sigurisë, absolutisht rrezikohen të drejtat e njeriut, e drejta për jetë, e drejta e lirisë së lëvizjes dhe e drejta e përcaktimit në bazë të vullnetit, pa iu nënshtruar asnjë presioni. Përfundimisht, KMDLNj konstaton se nuk ka kushte për mbajtje të zgjedhjeve dhe se të gjitha partitë politike, me një konsensus duhet të kërkojnë që ato të mbahen në një kohë kur të plotësohen kushtet për mbajtje të zgjedhjeve të lira dhe të pakushtëzuara. KMDLNj thërret të gjitha partitë politike të mos kontribuojnë në tensionimin e situatës duke bërë përpjekje të përfitojnë politikisht nga situata e krijuar”, theksohet në reagimin e KMDLNj-së.