Komuna e Prishtinës ka filluar furnizimin e shkollave me teste të shpejta antigjen për Covid-19.

Këtë e ka bërë të ditur kryetari i kësaj komune, Përparim Rama, përmes një postimi në rrjetin social “Facebook”.

“Duke pasur parasysh gjendjen aktuale të pandemisë, Komuna e Prishtinës për fillimin e gjysmëvjetorit të dytë të shkollës, është duke bërë furnizimin me teste të shpejta antigjen përmes pështymës për Covid-19. Shpërndarja e testeve ka filluar të bëhet nëpër institucione dhe gjatë pranimit të produktit ekipi i kontraktuar do tu japë informatat e hollësishme dhe do të ofrojë trajnim rreth përdorimit të testeve antigjen”, thuhet në shkrimin e tij.

Ai tregoi se në sa shkolla janë shpërndarë këto teste.

“Deri më tani testet antigjen janë shpërndarë nëpër tetë institucione parashkollore, shkolla fillore dhe të mesme të larta, kryesisht me numër të madh të nxënësve në zonat urbane. Në ditët në vijim mbetet të përfshihen edhe zonat periferike të kryeqytetit. Është planifikuar që testet të shërbejnë gjatë gjithë gjysmëvjetorit të dytë”, thuhet tutje në postimin e Ramës.

Ai gjithashtu tregoi se do të testohen vetëm nxënësit që kanë këto simptoma:

-Temperaturë mbi normale

-Kollitje apo ethe

-Kontakt me persona të infektuar.

Ndarja e testeve është bërë në proporcion me numrin e nxënësve në institucione.