Pasi e ka fituar garën IHF Trophy për Zonën Evropiane, Përfaqësuesja U17 e Kosovës në hendboll (vajzat) e ka siguruar të drejtën e paraqitjes në IHF Tropy Ndërkontinentale.

Federata Ndërkombëtare e Hendbollit (IHF) ka vendosur që IHF Trophy InterContinental të mbahet në Tashkent të Uzbekistanit. Kampionati ka peshë shumë të madhe për shkak se është kualifikues për Kampionatin Botëror të hendbollisteve të reja.

Me këtë synim të madh në mendje vajzat tona do të udhëtojnë për në Uzbekistan. IHF Trophy Ndërkontinentale do të mbahet prej 27 shkurtit deri më 3 mars të vitit të ardhshëm. Të kujtojmë që Kombëtarja U21 e Kosovës në hendboll është e vetmja prej të gjitha sporteve që deri më tani është kualifikuar dhe është paraqitur në Kampionat Botëror.

Tani këtë e synon edhe Kombëtarja U17, që në tetor e fitoi vendin e parë në IHF Trophy për Zonën Evropiane. Në finale vajzat tona kishin fituar ndaj Bosnjë-Hercegovinës me rezultat 39:33.