Kryetari i Partisë Demokratike të Kosovës, Memli Krasniqi, është ndjerë krenarë sot me potencialin e grave dhe të rejave që ka PDK-ja e të cilat me platformën e re për barazi të plotë gjinore 50-50 do të kenë hapësirën e merituar në vendimmarrje.

Kreu i PDK-së tha se barazia gjinore në vendimmarrje, 50/50, është vizion dhe qëllim që do ta kenë tash e tutje, duke theksuar se nuk ka kuptim pa energjinë pozitive dhe përkushtimin e aktivisteve të reja të PDK-së.

“Sot, gjatë Konventës Programore të Gruas Demokratike të Kosovës, kisha kënaqësinë që të bashkëbisedoj me përfaqësuese të së ardhmes së PDK-së, Arbnora Salihun, Aurora Nurën, Dhurata Muharremin, Jona Arifin dhe Vlera Tahirin. Idetë dhe planet e tyre për Kosovën, janë asgjë më pak sesa vlera të jashtëzakonshme! Vërtetë, jam krenar me potencialin që kemi në mesin tonë”, ka shkruar Krasniqi.