Ish-kryetari i Kuvendit të Kosovës, Jakup Krasniqi, ka vlerësuar se përpjekja për të uzurpuar KQZ-në është antikushtetuese.

Në profilin e vet në “Facebook”, ai ka shkruar se dispozitat kushtetuese rreth përfaqësimit të partive politike në këtë institucion janë shumë të qarta, duke shtuar se paqartësia është vetëm në kokat e atyre që po dëshirojnë ta grabisin atë që nuk u takon.

Sipas tij, anëtarët e KQZ-së emërohen nga pjesëtarët e gjashtë grupeve më të mëdha parlamentare të përfaqësuara në Kuvend.

Postimi i plotë i Krasniqit:

Neni 139 i Kushtetutës së Kosovës është i rezervuar për Komisionin Qendror Zgjedhor dhe i ka katër paragrafë.

Në paragrafin e parë thuhet:

“Komisioni Qendror Zgjedhor është organ i përhershëm që përgatit mbikëqyrë, drejton dhe verifikon të gjithë veprimet që kanë të bëjnë me procesin e zgjedhjeve e referendume dhe shpall rezultatet e tyre”.

Kur lexohet ky paragraf i cili KQZ-së i ka dhënë mandat të përhershëm, kush dha të drejtën Kryetares së KQZ-së që ketë organ të përhershëm ta bëjë jo funksional, në kohën kur anëtarët e KQZ marrin paga nga Buxheti i shtetit? Për ketë dikush do të duhej të përgjigjet.
Sa i përket çështjes shumë të debatueshme sesa anëtarë duhet t’i ketë e kë përfaqësojnë ata në Kuvend, Kushtetuta e jonë e thotë shumë qartë në paragrafin katër i cili thotë:
“Gjashtë (6) anëtarë emërohen nga pjesëtarët e gjashtë grupeve më të mëdha parlamentare të përfaqësuara në Kuvend, të cilët nuk kanë të drejtë të marrin pjesë në ndarjen e vendeve të rezervuara. Nëse në Kuvend janë më pak grupe, grupi a grupet më të mëdha mund të emërojnë anëtarë shtesë. (…)”.

Sipas kësaj dispozite kushtetuese gjërat janë më shumë sesa të qarta, paqartësia është vetëm në kokat e atyre që po dëshirojnë ta grabisin atë që nuk ju takon. Kjo të çon në përfundimin se grabitja po bëhet praktikë e keqe në çdo segment të jetës sonë shoqërore. Kjo praktikë nuk i duhet askujt.

Kushdo që e përcjell Kuvendin e sheh se Kryetari apo Nënkryetari që drejtojnë seancat e Kuvendit, ATA UA JAPIN FJALËN QË TË FLASIN në emër të GP të shqiptarëve gjashtë Kryetarëve të Grupeve që përfaqësohen në Kuvend.

/Epoka e re/