Ministri i Mbrojtjes i Kosovës, Ejup Maqedonci, është takuar me ministrin e Shtetit në Ministrinë Federale të Punëve të Jashtme të Gjermanisë, Florian Hahn, në kuadër të Konferencës së Sigurisë në Berlin.

Sipas njoftimit të Maqedoncit, në takim u diskutua për zhvillimet e fundit në rajon, thellimin e bashkëpunimit bilateral ndërmjet Kosovës dhe Gjermanisë, forcimin e partneritetit në fushën e mbrojtjes dhe industrisë ushtarake, si dhe avancimin e subjektivitetit ndërkombëtar të Kosovës.

Më tej, Maqedonci bëri të ditur se gjatë takimit, ministri gjerman Hahn shprehu mbështetjen për proceset integruese të Kosovës dhe perspektivën e saj euroatlantike.