Në Prishtinë ka filluar Java Evropiane e Sportit, që do të zgjasë deri më 30 shtator. Në ditën e parë, organizuar nga Ministria e Kulturës, Rinisë dhe Sportit (MKRS) dhe Komitetit Olimpik i Kosovës (KOK) është organizuar “Forumi për Sportin”.

Në këtë aktivitet kanë marrë Vlora Dumoshi, ministre e MKRS-së, Armend Zemaj, ministër i Shëndetësisë, Besim Hasani, kryetar i KOK-ut, si dhe përfaqësues tjerë nga federatat sportive, por edhe të Departamentit të Sportit, derisa Federatën e Basketbollit të Kosovës (FBK) e përfaqësuan kryetari Arben Fetahu dhe sekretarja e Përgjithshme, Elvira Dushku. Në temën “Sporti dhe Covid-19”, është folur për ndihmën që kanë nevojë federatat dhe klubet sportive. “Pakoja emergjente e ndarë nga Qeveria Hoti do të dedikohet për klubet, pasi jemi të vetëdijshëm që bizneset nuk kanë mundur të ndihmojnë klubet gjatë pandemisë. Do të bisedojmë bashkë me kryetarin e KOK-ut, Besim Hasani dhe federatat sportive, për kriteret dhe mënyrën e ndarjes së tyre. Ligji për Pakon Emergjente është dërguar tri herë në Kuvendin e Kosovës, por nuk është miratuar nga Deputetët. Sigurisht se kur të miratohet do të ndihmojmë federatat dhe klubet”, ka thënë ministrja Dumoshi, gjatë pjesëmarrjes në “Forumin e Sportit”, që hapi Javën Evropiane të Sportit.

Ajo kishte edhe një falënderim në këtë Forum. “Falënderoj Federatën e Basketbollit, që së bashku me Federatën Shqiptare të Basketbollit kanë formuar Ligën Unike. Këso iniciativa duhet të ndërmarrin edhe federatat tjera, sidomos në këtë kohë të pandemisë, kur ka më pak aktivitete sportive”, ka shtuar Dumoshi, e cila kërkoi që të ndihmohen më shumë edhe klubet e femrave. Ministrja Dumoshi bëri me dije se përkrahja e MKRS-së për sportin në kohë pandemie është bërë me një kujdes të veçantë. “Prioritet i MKRS edhe ketë vit janë investimet që janë duke u realizuar në Modernizimin e Infrastrukturës sportive. Këto investime kalojnë shumën e 19 milion euro në mbi 80 projekte infrastrukturore, në te gjitha komunat e Kosovës duke u realizuar në stadiume, palestra, fusha të tenisit, pishina, poligone sportive, shtigje te atletikes, ku përfitues janë edhe komunat e komuniteteve dhe tërë këto investime të MKRS-së ndikon edhe në Masivizimin e sportit në përmbushje të objektivit ‘Sport për te gjithë’”, ka shtuar ajo. Ndërkohë, ministri Zemaj theksoi se pritet që të ketë lehtësim të masave, sa i përket zhvillimit të ngjarjeve sportive. “Do të kemi lehtësim të masave në disa aktivitete sportive, të cilat janë të domosdoshme në numër dhe masë. Ne do të kemi mbikëqyrje strike, bazuar edhe në zotimin që kemi marrë nga Komiteti Olimpik i Kosovës dhe federatat sportive. Nuk do të doja që asnjë federatë të mbyllet për shkak të mosrespektimit të masave. Disa ngjarje ndërkombëtare janë zhvilluar si ndeshja Kosovë-Greqi në futboll te meshkujt apo Kosovë-Estoni te femrat, por të gjitha janë bërë me rekomandime, por edhe një mbikqyrje të madhe”, ka thënë ministri i Shëndetësisë. Besim Hasani, kryetar i KOK-ut, foli për qëllimin e mbajtjes së këtij Forumi. “Qëllimi i Javës Evropiane është që sa më shumë njerëz të merren me sport, andaj marrë parasysh numrin e vogël që merren me sport, duhet të fokusohemi që sa më shumë fëmijë të merren me sport. Prindërit, vëllezërit, motrat dhe gjyshërit duhet të marrin fëmijët për t’i regjistruar në ndonjërën prej klubeve të komunave të tyre në Kosovë, ashtu siç i marrin për t’i dërguar në shkollë”, ka deklaruar Hasani.