Qeveria e Kosovës ka miratuar Koncept-dokumentin për çështjen e pasurisë së përfituar në mënyrë të pajustifikueshme.

Këtë dokument para kabinetit qeveritar e ka prezantuar ministrja e Drejtësisë, Albulena Haxhiu.

“Ministria e Drejtësisë ka iniciuar koncept dokumentin për pasurinë e fituar në mënyrë të pajustifikueshme, mangësitë dhe problemet që ekzistojnë në këtë fushë. MD pas miratimit të këtij koncept-dokumenti do të hartojë projektligjin që do të përmbajë rregullimin e koncepteve për hetimin e pasurisë së pajustifikueshme që ju takon personave të dyshuar. Synohet që të themelohet një agjenci e pavarur e cila inicion procedurën ndaj personave të dyshuar që kanë fituar pasurinë në mënyrë të jashtëligjshme”, ka thënë ajo.

“Nuk kërkohet që njëherë të dënohet personi me aktgjykim dënues e pastaj të fillojnë procedurat e konfiskimit ndaj tij. Ky ligj do të gjejë zbatim që para shpalljes së pavarësisë.  Ky ligj do të mbrojë interesin publik, në drejtim të asaj se pasuria publike mbetet e qytetarëve”, ka thënë Haxhiu.

Për këtë koncept-dokument ka folur edhe kryeministri i Kosovës, Albin Kurti.

“Draft – koncept dokumenti trajton tri opsione kryesore, ‘status quo’-në pa asnjë ndryshim, përmirësimi i zbatimit të krijimit ligjore pa ndryshime legjislative, opsion që ka adresuar probleme po e ka të pamundur që të ofrojë bazë të re ligjore, dhe së fundmi hartimi i ligjit të ri për konfiskimin e pasurisë. Pas analizës së bërë, opsioni për miratimin e ligjit vlerësohet se më i përshtatshëm për t’i adresuar problematikat e identifikuara”, ka thënë Kurti.