Mustafa: Liberalizimi do të ndodhte në vitin 2016, e kundërshtonin zyrtarët që sot janë në krye të shtetit

28 shtator 12:49

Ish-kryeministri i Kosovës, Isa Mustafa, e ka thënë me plotë bindje se Kosova tashmë i ka përmbushur të gjitha kriteret për liberalizimin e vizave.

Mustafa ka thënë se çështja e liberalizimit të vizave është përmbyllur në fillimet e vitit 2018, atëherë kur është ratifikuar marrëveshja e kufirit me Malin e Zi.

“Kosova i ka përmbushur të gjitha kriteret për liberalizimin e vizave. Formalisht kjo është përmbylli me ratifikimin e marrëveshjes së kufirit me Malin e Zi në fillim të vitit 2018, i njëjti tekst që kundërshtohej më 2016?!”, ka thënë Mustafa.

Sipas Mustafës, shpresën e qytetarëve të Kosovës për liberalizim të vizave mund ta thyejë edhe një vend i veçantë.

“Nuk ka pasur asnjë arsye që procesi të prolongohet dhe Kosova të futet në një zonë kohore të pasigurisë dhe të varshmërisë nga politikat dhe vullneti i shteteve të veçanta, sepse kriteret kanë përfaqësuar qëndrimet e të gjitha shteteve. Tani duhet të shpresojmë se procesi për liberalizim do të fillojë nga tetori i këtij viti por këtë shpresë mund ta thyejë edhe një vend i veçantë”, ka thënë Mustafa për gazetën “Blic”.

Mustafa ka thënë se liberalizimi i vizave mund të arrihej në vitin 2016 ku sipas tij ka qenë kohë ideale, sepse nuk ka pasur asnjë kundërshtim.

Ai ka thënë se ky proces në atë kohë është kundërshtuar vetëm nga LV-ja dhe nga disa deputetë të LDK-së, që edhe tani janë në Kuvend.

Mustafa ka akuzuar LV-në duke thënë se për kauzat e tyre populliste dhe motive karrieriste, qytetarët kanë mbetur të izoluar, teksa kërkon që të ndjejnë përgjegjësi ndaj këtij pezullimi.

“Në vitin 2016 ka qenë koha më ideale për liberalizim, sepse nuk kemi pasur asnjë kundërshtim, sikur të votohej për demarkacionin në Kuvend. Atëherë këtë e kundërshtonin zyrtarët e sotëm që janë në krye të shtetit sikurse edhe disa deputetë të LDK-së që edhe sot janë në Kuvend. I humbëm 6 vjet për kauza populliste duke i lënë qytetarët të izoluar. Qytetarët meritojnë liberalizimin, por njerëzit që e penguan me kauza të rrejshme e për motive karrieriste do duhej të ndjejnë përgjegjësi para qytetarëve”, ka deklaruar Mustafa.

Lajme të sponsorizuara

Të fundit
Përfaqësuesja e Kosovës të martën në mbrëmje e mposhti Qipron…