Mbrëmë, ish-presidentja Vjosa Osmani, tash deputete e LDK-së, ka sulmuar sërish ashpër ish-kryeministrin e Kosovës dhe dikur bashkëpartiakun e saj, Isa Mustafa.

Vjosa Osmani, në paraqitjen e mbrëmshme, ka sulmuar thuajse çdo figurë politike që ka funksionuar apo vazhdon të jetë aktive në Kosovë, përveç mikut të saj, Lumir Abdixhiku, i cili, përpos të tjerash, ka humbur tri palë zgjedhje radhazi dhe sërish, bashkë me Vjosa Osmanin, ka shkuar në secilin takim me Albin Kurtin, vetëm që të arrinin marrjen e ndonjërit prej posteve drejtuese.

Pikërisht Vjosa Osmani, derisa po fliste për qeverinë Kurti, ka thënë se ata duhet të përmirësohen, e jo të bëhen kopje të qeverive Thaçi dhe Mustafa.

“Le të përmirësohen, jo të bëhen kopje të këqija të Isës dhe Hashimit. Duhet të kenë më shumë ambicie. Edhe unë si presidente për dy vite është dashur të merrem me pasojat e dëmeve që i kanë bërë të tjerët përpara”, ka thënë mbrëmë Osmani në “Kanal10”.

Në lidhje me këtë deklarim, “lajmi.net” ka kontaktuar me ish-kryeministrin Isa Mustafa, i cili ka dhënë një përgjigje të shkurtër.

“Është dëm të merrem me të. Është katandisur keq”, është shprehur Mustafa.

Osmani mbrëmë ka sulmuar edhe bashkëpartiakët e saj, konkretisht gjashtë deputetët që ishin kundër marrëveshjes LV-LDK për çështjen e presidentit.

“Ata thanë para se të kthehet kërko falje, dhe unë ju thash jo, nuk kërkojë falje për asgjë. Sepse LDK-ja me ka lutur me u rikthy. Asgjë nuk i kam kërkuar LDK-së, as nuk i kam kërkua pozicion partiak, as sot nuk i kërkoi asgjë. Jam kthy me ndihmu. Natyrisht që ShIK-ut i pengon kjo. Po pse disa po veprojnë në interes të tyre brenda partisë është e tmerrshme, është e dëmshme”, ka thënë ajo.

Gjatë intervistës së mbrëmshme, ajo ka thënë edhe diçka që as LV-ja nuk e ka thënë deri më tani.

Sipas saj, Avdullah Hoti është bërë kryeministër i Kosovës me vota të vjedhura.

“Dhe në qoftë se mendojnë që tash e tutje unë do ta uli kryt, sepse unë si presidente, edhe në kohë fushate, ua kam përbi ofendimet, edhe tash një kohë të gjatë. Sepse mendoja se ndoshta ata i kuptojnë gabimet e se kaluarës. Ndoshta ata e kuptojnë që shkarkimi im ka qenë gabim, ndoshta ata e kuptojnë që rrëzimi një qeveri në kohë pandemie ka qenë gabim. Ndoshta Hoti e kupton që fakti që i ka kontrbanduar votat që i kam marrë unë si kandidate për kryeministre dhe me vota të vjedhura dhe me vullnet të vjedhur qytetar ka krijuar atëherë Qeveri ka qenë gabim”, ka thënë ajo, duke u marrë edhe me deputeten Hykmete Bajrami.

“Ndoshta zonja Bajrami e kupton që të dalësh publikisht dhe të thuash se nuk ka problem me Listën Serbe është gabim që e dëmton partinë pariparueshëm. Ndoshta z. Hoti e kupton që nuk është mirë me u zgërdhi para Vuçiqit dhe me i thënë “razumem”. Ditën që e kuptojnë çfarë demi i është bërë partisë prej këtyre gabimeve, ajo është dita që LDK-ja fillon me u rikthy”, ka thënë Osmani.

Madje, sipas saj, këta deputetë i shërbejnë ShIK-ut.

“Ata thanë para se të kthehet kërko falje, dhe unë ju thash jo, nuk kërkojë falje për asgjë. Sepse LDK-ja me ka lutur me u rikthy. Asgjë nuk i kam kërkuar LDK-së, as nuk i kam kërkua pozicion partiak, as sot nuk i kërkoi asgjë. Jam kthy me ndihmu. Natyrisht që ShIK-ut i pengon kjo. Po pse disa po veprojnë në interes të tyre brenda partisë është e tmerrshme, është e dëmshme”, ka thënë ajo.

Në lidhje me këtë deklarim, ka reaguar ashpër edhe ish-kryeministri, tash deputet, Avdullah Hoti.

“Turizmi politik është aktivitet joetik në politikë. Koha po i sqaron të gjitha. Kur mbaron sezoni i turizmit politik, mbetesh në rrugë, i frustruar, i nervozuar, deri në ofertën turistike politike të radhës. Matrapazët politikë edhe mund ta gjejnë ndonjë ofertë. Por shtëpia nuk zëvendësohet me strehën e kundërshtarit, që të shfrytëzon për interesa të veta. Sërish, koha po i nxjerr në dritë të gjitha të vërtetat”, ka shkruar Hoti.

Në lidhje me deklarimet e Osmanit, “lajmi.net” u ka dërguar pyetje edhe deputetëve të tjerë të LDK-së, Hykmete Bajrami dhe Armend Zemaj, por deri në momentin e publikimit të këtij artikulli nuk ka marrë përgjigje.