Ka dalë nga shtypi libri “Ndërtim urash me fjalë të urta : (aforizma, këshilla dhe poezi)” i autorit Iljasa Salihu, botim i shtëpisë botuese “Armagedoni”.

Libri “Ndërtim urash me fjalë të urta” është një përmbledhje e pasur me aforizma, këshilla dhe poezi, përmes të cilave autori Salihu synon të ndërtojë ura komunikimi, reflektimi dhe vetëdijesimi ndërmjet njerëzve. Që në titull shpaloset metafora qendrore e veprës: në vend të mureve që ndajnë, autori zgjedh fjalën e urtë si mjet bashkimi, afrimi dhe ndërtimi të marrëdhënieve njerëzore.

Pjesa më e madhe e librit përbëhet nga aforizma dhe mendime të shkurtra të cilat trajtojnë tema të ndryshme shoqërore, morale, politike, fetare dhe njerëzore. Autori shfaq një vëmendje të veçantë ndaj fenomeneve që e shqetësojnë shoqërinë bashkëkohore, si korrupsioni, padrejtësia, hipokrizia, keqpërdorimi i pushtetit, degjenerimi moral dhe largimi nga vlerat themelore njerëzore. Përmes një gjuhe të drejtpërdrejtë ai godet dukuritë negative duke synuar ta zgjojë ndërgjegjen e lexuesit.

Një ndër veçoritë kryesore të kësaj vepre është përpjekja për ta lidhur urtësinë tradicionale me realitetin bashkëkohor. Aforizmat nuk mbeten vetëm në nivelin e konstatimeve morale, por shndërrohen në komente të mprehta për jetën publike dhe private. Në shumë raste autori përdor lojën me fjalë, krahasimet dhe metaforat për të krijuar mendime që mbeten gjatë në kujtesën e lexuesit.

Dimensioni shpirtëror dhe etik zë një vend të rëndësishëm në libër. Autori i kushton vëmendje të veçantë besimit, familjes, edukimit, mirësisë, ndershmërisë dhe përgjegjësisë individuale. Këto vlera paraqiten si shtyllat mbi të cilat mund të ndërtohet një shoqëri më e drejtë dhe më humane. Përmes tyre, vepra fiton jo vetëm karakter letrar, por edhe edukativ e motivues.

Poezitë e përfshira në libër plotësojnë mozaikun tematik të veprës dhe sjellin një dimension më emocional dhe meditativ. Ato dëshmojnë ndjeshmërinë e autorit ndaj njeriut, atdheut, besimit dhe sfidave të kohës sonë, duke krijuar një ekuilibër mes mendimit aforistik dhe shprehjes poetike.

“Ndërtim urash me fjalë të urta” është një vepër që fton në reflektim dhe debat. Ajo nuk synon vetëm ta argëtojë lexuesin, por edhe ta nxisë të mendojë për veten, shoqërinë dhe përgjegjësinë që secili ka ndaj së mirës së përbashkët. Përmes fjalës së shkruar, Iljasa Salihu ndërton ura dialogu, urtësie dhe vetëdijesimi, duke e bërë këtë libër një kontribut të çmuar në fushën e aforizmit dhe mendimit refleksiv në gjuhën shqipe.

Shënime për autorin

Iljasa Salihu lindi më 10 prill 1984 në fshatin Llojan të Kumanovës. Shkollimin fillor e kreu në vendlindje, ndërsa shkollimin e mesëm në Shkollën e Mesme të Makinerisë në Kumanovë. Studimet për Ekonomi i ka mbaruar në Universitetin e Prishtinës. Menjëherë pas diplomimit të studimeve baçelor, ka regjistruar studimet pasdiplomike në UEJL të Tetovës, në Drejtimin Studime të Sigurisë, në të cilat ka magjistruar në vitin 2011.

Përgjatë punës së rregullt në Ministrinë e Mbrojtjes si këshilltar financiar që disa vjet, merret edhe me publicistikë dhe me sport, gjegjësisht është njohës i arteve marciale dhe, së fundmi, edhe maratonist. Ka marrë pjesë nëpër shumë ligjërata, tribuna dhe debate, organizuar në televizione dhe qendra kulturore dhe arsimore. Ka qenë redaktor i revistës mujore Zëri i shqiptarit me qendër në Prishtinë, ka shkruar për revis­tën Paqja dhe revistën Shenja dhe për gazeta ditore në Shkup, në Tiranë dhe në Prishtinë.

Deri më tani i ka botuar këto libra:

Rrugëtimi nëpër mjegulla (ese, polemika), Shkup, 2010

Mëngjesi i hershëm, (roman), Shkup, 2011

Krimi ekonomik (shkencor), Shkup, 2012

Rrjedhat ekonomike në fshatin Llojan, (shkencor), Shkup, 2013

Beteja e paqes (roman), Shkup, 2013

Libri, rinia dhe liria, (libërth), Shkup, 2014

Shtrati i lules (aforizma), Shkup, 2014

Lumëbardhi i gjyshes (roman), Shkup, 2016

Njeri i parimit, i punës dhe i pushkës (biografi), Shkup, 2017

Kur të mërzitesh shumë (aforizma), Prishtinë, 2017