Pacolli: Heroizmi i familjes Jashari dhe UÇK-së ndryshoi rrjedhën e historisë së Kosovës
Kryetari i Aleancës Kosova e Re (AKR), Behgjet Pacolli, e ka kujtuar Epopenë e Ushtrisë Çlirimtare të Kosovës në përvjetorin e saj.
Pacolli ka thënë se Epopeja e UÇK-së e udhëhequr nga komandanti legjendar Adem Jashari shënon kulminacionin e sakrificës për lirinë dhe pavarësinë që gëzohet sot.
“Bota perëndimore njohu guximin, sakrificën, flijimin, dhe vullnetin e shqiptarëve për liri dhe shtet. UÇK-ja ishte në ballë të kombit, përderisa ajo çfarë gëzojmë sot, ishte besimi i ushtarëve, se kjo tokë e ky vend, përherë ka qenë, është, dhe do të mbetët, amaneti i njerëzve të saj”.
“Heroizmi dhe sakrifica e familjes Jashari dhe e Ushtrisë Çlirimtare të Kosovës ndryshoi rrjedhën e historisë së Kosovës. UÇK-ja u dha fund përpjekjeve për ta çuar Kosovën në autonomi dhe nën sundimin vazhdueshëm serb dhe bëri që populli i Kosovës të luftojë për pavarësinë dhe lirinë e Kosovës. Pas sakrificës së familjes Jashari, nuk kishte rrugë tjetër veç sakrificës kolektive për atdheun”, ka shkruar Pacolli në llogarinë e vet në “Facebook”.
Ai ka deklaruar mes tjerash se “Epopeja edhe lufta e UÇK-së në Kosovë dhe lufta në Ukrainë sot janë luftë e civilizimit kundër barbarisë në Evropë. Luftë kundër agresionit. Është lufta kundër fashizmit dhe tiranisë!”.