Ish-presidenti i Kosovës dhe kryetari i AKR-së, Behgjet Pacolli, duke folur për situatën e tensionuar në veri të vendit është shprehur i zhgënjyer me veprimet e kryeministrit Albin Kurti, i cili sipas tij nuk i ka bashkërenduar veprimet me aleatët ndërkombëtarë.

Pacolli gjatë një interviste për “Euronews Albania”, ka thënë se kryeministri i Kosovës ka dështuar në rrafshin ekonomik dhe diplomatik dhe ndaj sipas tij “faturën” do ta paguajë Kosova, e cila ka theksuar se rrezikon të humbasë atë që është arritur deri tani në arenën ndërkombëtare.

“Ju po i shihni reagimet. Dënohet dhuna e banditëve serbë kundër KFOR-it, por dënohen dhe veprimet e njëanshme të Qeverisë së Kosovës. Sot i kërkohet tërheqja mbrapa Qeverisë së Kosovës. Nuk e di çfarë fitore është që t’i ta çosh një kryetar të punojë dy orë në zyrë dhe pastaj përfundon duke punuar nga shtëpia. Kujt do t’i shërbejë ai nga shtëpia? Nuk ka kujt t’i shërbejë! Jam krejt i zhgënjyer të shikojë këto imagjinacione në vendin tim. Një qeveri që nuk bashkërendit veprimet me partnerët ndërkombëtarë. Albin Kurti ka dështuar në planin ekonomik dhe diplomatik, nuk është i favorshëm për Kosovën. Duhet me u tërheq sa më shpejt nga qeveria nëse duhet t’i bëjë një favor Kosovës. Unë gjithmonë kam kërkuar rrugë konstruktive, jam i zhgënjyer deri në fund në këtë situatë”,  ka thënë Pacolli.

Më tutje, ka thënë se Kosova nuk është e aftë ta luftojë Serbinë pa aleatët dhe në këtë drejtim sipas tij vendi ynë do të marrë kosto për veprimet e njëanshme të kryera në veri të cilat kanë çuar në tensionimin e situatës.

“Këtu qëndron bindja ime, pas çdo veprimi të Albin Kurtit, Vuçiqi ka pasur suksese. Gjithmonë kështu ka qenë. Për veprimet kundër targave, kush humbi? Humbi Kosova! Shkuarja e policisë në veri, çfarë solli? Solli barrikada dhe kushtëzime deri sa tërheqja e barrikadave të banditëve serbë u kushtëzua me tërheqjen e Policisë së Kosovës. Kush është humbës? Jemi ne! Në këtë situatë, Vuçiqi, ose pala serbe do të ketë koncesione të tjera dhe Kosova duhet ta hapë trastën e vetë dhe të paguaj dhe për këtë. Kjo nuk i falet Albin Kurtit kësaj radhe. Sa kohë është në pikëpyetje mënyra e qeverisjes ai nuk duhet të luaj me fatin e Kosovës dhe atë që është krijuar deri tani. Frika ime nuk është se Veriu që do t’i kalojë Serbisë, por është dashur të pritet dhe veprimet të bashkërendohen me miqtë ndërkombëtar, duke e ditur se Kosova sot nuk është e aftë të luftojë Serbinë”, ka thënë Pacolli.