Zëdhënësi i PDK-së, Faton Abdullahu, ka bërë me dije se kjo parti është kundër idesë për shtyrjen e zgjedhjeve lokale të 17 tetorit.

Ai ka deklaruar për gazetën “Epoka e re”, se zgjedhjet nuk duhet të mbahen në mënyrë konvencionale.

Sipas tij, ato duhet të mbahen duke respektuar masat dhe rekomandimet e IKShPK-së.

“Ne, si Parti Demokratike e Kosovës, nuk jemi që zgjedhjet lokale të shtyhen. Ato duhet të mbahen në kohën kur janë planifikuar. Mirëpo, Zgjedhjet e Tetorit, nuk duhet të mbahen në mënyrë konvencionale, me tubime e grupime të njerëzve, por duhet që në mënyrë strikte të respektohen masat dhe rekomandimet e IKShPK. Nëse duhet, në përputhje me gjendjen në terren dhe rekomandimet e institucioneve përgjegjëse, ato masa duhet të ndryshohen e plotësohen”, ka deklaruar Abdullahu.

Ai ka deklaruar se qeveria aktuale me mosveprimet e saj është bërë rrezik për qytetin dhe shumë procese tjera. “Në anën tjetër, nëse arsyetimi për shtyrjen e zgjedhjeve është se me këtë mbrohet shëndeti i qytetarëve, gjë që është, atëherë është e vështirë, në të vërtetë krejt e pamundur, për t’i besuar kësaj mendësie, tashmë institucionale politike. Me veprime, përkatësisht me mosveprime, tash e një kohë, kjo qeverisje ka krijuar gjendjen në terren e cila thjeshtë është bërë alarmante dhe e rrezikshme për jetën e qytetarëve të Kosovës dhe për fat të keq edhe për shumë procese e zhvillime, sidomos në fushën e arsimit”, ka deklaruar ai.