Aksioni i Karaçevës për mbylljen e kazinove është duke vazhduar edhe sot në rajone të tjera të Kosovës

Kjo është bërë e ditur me anë të një komunikate për medie nga Prokuroria e Gjilanit, IPK-ja dhe Policia e Kosovës, shkruan lajmi.net.

“Prokuroria Themelore në Gjilan, ju njofton se në orët e para të mëngjesit të 01 tetorit 2020, zyrtarët e agjencive të zbatimit të ligjit nga Policia e Kosovës, Inspektorati Policor i Kosovës dhe agjencitë e tjera bashkëpunuese, janë duke ekzekutuar urdhërkontrolle në rajone të ndryshme të Kosovës”, është thënë në komunikatë.

Sipas kësaj komunikate, ky aksion është vazhdimësi e operacionit të zhvilluar më 18 shtator 2020, në zonën e Karaçevës dhe rajone tjera të Kosovës, për shkak të dyshimit të përfshirjes në veprimtari kriminale.

“Prokuroria Themelore në Gjilan, në koordinim dhe bashkëpunim me Policinë e Kosovës dhe Inspektoratin Policor të Kosovës, do të ju mbajë të informuar lidhur me këtë operacion të përbashkët”, është thënë në këtë komunikatë.