Gjergj Dedaj, ish-ambasadori i Kosovës në Maqedoni të Veriut, deklaroi në Gjykatën Speciale se e ashtuquajtura presidente, Vjosa Osmani e largoi nga ky post.

Ndaj deklaratave të tij kanë reaguar nga Presidenca.

Bekim Kupina, këshilltar I presidentes, Vjosa Osmani, deklaroi se Dedaj në Speciale përhapi gënjeshtra, dhe e quajti Osmanin me fjalë të njëjta sikurse Serbia.

Ai tutje tha se Dedaj i pëlqen gënjeshtrat, dhe është një përfitues prej tyre.

Postimi i plotë:

Gjergj Dedaj paska zgjedhur Gjykatën Speciale për të përhapur gënjeshtra lidhur me Presidenten Osmani, duke e quajtur me të njëjtat fjalë sikurse Serbia. Presidentja Osmani nuk është “e ashtuquajtur”, siç e cilëson Serbia dhe ti Gjergj, por ka më së shumti legjitimitet në historinë e Kosovës.

Ti e di këtë, por s’të pëlqen ky fakt. Prandaj  sot e bëre atë që di më së miri: gënjeve.

Së pari, Presidentja Osmani nuk të ka hequr ty për ta emëruar bashkëshortin e saj. Të hoqën shkeljet e tua. Së dyti, bashkëshorti i saj as nuk ka qenë e as nuk është ambasador, ndaj ti jo që s’e di, por ama të pëlqen gënjeshtra si mjet viktimizimi. Ti je veç një përfitues nga gënjeshtra!

Ne ende jemi në pritje të drejtësisë për kërcënimet me jetë që i ke bërë publikisht ndaj Presidentes dhe familjes së saj.