Të shumtë ishin refugjatët të cilët gjatë luftës së fundit lëshuan Kosovën për të marrë rrugë drejt vendeve perëndimore duke kërkuar një jetë më të sigurt edhe pse jo me dëshirë. Disa prej tyre krijuan karrierë në shumë fusha në ato shtete, e nuk mungojnë edhe ata që në sport bëjnë që të përmendet emri i shtetit më të ri në Evropë, që ndoshta dikush nuk ka dëgjuar kurrë për të.

Një nga këta refugjatë është edhe futbollistja e ekipit anglez Charlton, Elizabeta Ejupi e cila në moshën tre vjeçare së bashku me prindërit dhe vëllanë e saj më të madh iku nga lufta për në Londër, njofton “Telegraph”.

“Atje kishte masakra, vrasje dhe ne duhej të iknim për të shpëtuar”, ka sqaruar Ejupi. Nëna e saj ishte ende duke studiuar në universitet kur ajo me familje u shpërngulë. “Ata vetëm duhet të linin gjithçka, kushërinjtë e mi dhe axhallarët shkuan në Gjermani. Ju gjeni kosovar në Zvicër, Amerikë, ata janë gjithkund për shkakë të asaj lufte”, shton futbollistja kosovare.

Ejupi tregon se gjatë asaj kohe ajo mendonte se udhëtimi drejt Londrës ishte vetëm për pushime. “Mendova se ne po shkonim për pushime, se po shkonin jashtë vendit për pak, ishte një aventurë”, shton 24-vjeçarja. Megjithatë ajo dhe familja e saj nuk ka harruar vendlindjen.

“Ne jemi larguar por ne ende kujtojmë rrënjët tona, kulturën tonë dhe nuk kemi thënë kurrë ajo është e kaluar, ta harrojmë”, thotë Ejupi për “Telegraph”. Mesfushorja e Charlton ka përfunduar se ajo gjithashtu mban kontakte edhe me të afërmit e saj që kishin fatin e njëjtë me të saj duke ikur nga vendlindja.