Vaksina e re e ‘Moderna’ akoma më e mirë, të premten merr lejen për t’u përdorur

17 dhjetor 16:56

Të enjten një grup këshilltarësh të jashtëm të Administratës Amerikane të Ushqimit dhe Barnave pritet të rekomandojë dhënien e autorizimit për përdorim emergjent të vaksinës kundër koronavirusit të prodhuar nga kompania “Moderna”.

Vendimi i grupit ka të ngjarë të merret pas orës 3 pasdite ndërsa të premten pritet autorizimi nga FDA-ja.

Ky është i njëjti grup ekspertësh që javën e kaluar rekomandoi dhënien e autorizimit për vaksinën e “Pfizer”-it dhe partnerit të saj gjerman “BioNTech”, duke i hapur rrugë vendimit të FDA-sa një ditë më pas.

Vaksina e “Pfizer”-it po shpërndahet tashmë në të gjithë vendin. Të hënën në spitalet amerikane ka filluar një program masiv imunizimi.

Vaksina e “Moderna”-s është zhvilluar me një teknologji të ngjashme me atë të “Pfizer”-it duke përdorur acidin ribonukleik, por mund të ruhet në temperatura shumë më pak të ulta sesa vaksina e “Pfizer/BioNTech”-ut. Kjo e bën atë një opsion më të mirë për zonat e thella e rurale. Të dy vaksinat janë rreth 95 për qind të efektshme në parandalimin e sëmundjes bazuar në provat klinike të fazës së fundit.

Grupi i këshilltarëve të jashtëm të FDA-së ka të ngjarë të diskutojë rreth efekteve anësore të vaksinës së “Moderna”-s të ndeshura gjatë provave klinike me 30 mijë pjesëmarrës, të cilat ishin më të shpeshta se ato të raportuara nga “Pfizer”-i. Ato ishin kryesisht reagime relativisht jetëshkurtra ndaj vaksinimit sesa efekte anësore të rënda.

Ekspertët e kompanisë “SVB Leerink” kanë thënë se vaksina e “Moderna”-s duket më pak e tolerueshme sesa ajo e “Pfizer/BioNTech”-ut, por sipas tyre kjo nuk është mënyra e duhur për të bërë krahasim dhe nuk ka gjasa të pengojë dhënien e autorizimit për vaksinën.

Në një dokument të botuara të martën përpara takimit të së enjtes të grupit të këshilltarëve, stafi i FDA-së ka thënë se nuk ka ndonjë shqetësim serioz në lidhje me sigurinë e vaksinës së Moderna-s. Megjithatë sipas dokumentit nuk mund të përjashtohet ndikimi i vaksinës në krijimin e të ashtuquajturës paraliza Bell, e cila shkakton paralizë të përkohshme të muskujve të fytyrës. Të dhënat tregojnë se gjatë provave klinike me të dy vaksinat u raportuan disa raste të paralizës faciale.

“Pfizer” dhe “BioNTech” kanë theksuar se incidenca ishte e njëjtë me atë të popullatës së përgjithshme, raporton “VOA”.

“Moderna” kërkon autorizimin për përdorim të vaksinës tek personat nga 18 vjeç e lart. Kjo mund të shmangë diskutimin e ndezur javën e kaluar mes anëtarëve të grupit nëse kishte të dhëna të mjaftueshme për të autorizuar përdorimin e vaksinës të “Pfizer/BioNTech”-ut tek adoleshentët e moshës 16 dhe 17 vjeç. Ata kanë votuar përfundimisht për të mbështetur vaksinimin e të gjithë atyre nga mosha 16 vjeç e lart.

Shtetet e Bashkuara kanë të ngjarë të furnizohen të parët me vaksinën e “Moderna”-s, dhe kanë nënshkruar për këtë një marrëveshje për të siguruar deri në 200 milionë doza. ShBA-ja pret të marrë 20 milionë dozat e para këtë muaj. Vaksina e “Moderna”-s jepet në dy doza me distancë prej 28 ditësh nga njëra-tjetra.

Kompania ka nënshkruar marrëveshje mbi vaksinën edhe me Kanadanë, Bashkimin Evropian dhe Mbretërinë e Bashkuar dhe po kalon në procese shqyrtimi nga entet e tyre rregullatore.

Lajme të sponsorizuara

Të fundit
Dominik Szoboszlai edhe zyrtarisht është lojtar i RB Leipzigut. Këtë…