Askush nuk e ka harruar garën e fundit sezonale të vitit të kaluar në Formula 1, me Max Verstappen që shpallej kampion bote pas parakalimit që i bënte Lewis Hamilton pak kilometra nga finishi. Në atë garë, piloti holandez i Red Bull mori një ndihmë të madhe nga shoku i tij i skuadrës, Sergio Perez, që arriti të mbajë pas britanikun e Mercedes.

“Kur dola nga bosket dhe ndërrova gomat nuk e shihja Lewis, pasi ishte shumë përpara meje. Dija që para tij ishte Perez, që nuk ishte ndalur ende dhe bëri të mundur që të bllokonte Lewis. Nëse ai nuk do ta kishte bërë atë gjë, nuk do të isha kampion bote. Lewis do të kishte pasur mundësi të ndërronte sërish gomat dhe sot do të ishte ai kampion”, ka thënë Verstappen.

“Fakti që Perez e reduktoi tërësisht avantazhin që Hamiltoni kishte me mua bëri që strategjitë të ndryshonin. Më pas edhe fati bëri punën e tij, me aksidentin e Latifi dhe mundësinë që m’u dha për të ndërruar gomat. Aty pashë mundësinë se mund të fitoja garën e titullin”, ka shtuar Verstappen.