Pretendimet për rritje të pagës minimale pa përfshirë rritjen e pensioneve të veteranëve ka alarmuar këta të fundit. Veteranët duke paralajmëruar protestë 48 orë pas marrjes së këtij vendimi, thanë se një vendim i tillë është shumë rrezik për stabilitetin e Qeverisë.

Ndërkaq, iniciativën e kryeparlamentarit Veseli për formim të një komisioni hetimor për veteranët e rrejshëm, e shohin si të parëndësishme dhe se nuk mund t’i besojnë një komisioni të tillë.

Kryetari i OVL UÇK-së, Hysni Gucati në një intervistë për Kp tha se pensionet e tyre duhet të rriten bashkë me pagën minimale dhe se ndryshimi i Ligjit të Veteranëve nuk vjen në shprehje.

“Nuk vjen në shprehje ajo që të bëhet ndryshimi i ligjit te veteranët e luftës, se atëherë  ministri mundet të luaj me lojërat e veteranëve që nuk i ka hije. Është shumë rrezik për vet Qeverinë dhe për ministrin. Unë po e paralajmëroj Qeverinë prej këtij vendi ku jam që brenda 48 orëve ne do të dalim në rrugë. Unë do t’i bëjë ftesë gjithë veteranëve të luftës që të dalim në rrugë në protestë për atë të drejt që mund të takoj neve”, u shpreh Gucati.

Për iniciativën e kryeparlamentarit Veseli që të formohet një komision hetimor parlamentar, i cili do të hetojë e pastrojë listat e veteranëve të UÇK-së, sipas Gucatit mund të jetë ndërhyrje në drejtësi.

“Prej frikës gjithmonë po flas se nuk mund të ketë sukses edhe është duke ma marrë mendja që po përzihet në drejtësi. Tash ka filluar edhe prokuroria të hetoj rastet dhe të merret me to. Unë nuk e shohë të udhës që të jetë një komision parlamentar. Edhe pse nuk besoj në këtë komision, arsye që nuk besoj që do të formohet është për shkak se ka grupe parlamentare aty dhe duhet të votohet dhe në parlament nga gjitha grupet parlamentare”, u shpreh ai.

Në lidhje me numrin e saktë të veteranëve, ai tha se janë rreth 39 mijë që marrin pensione, ndërsa numri i saktë i tyre sillet rreth 20 mijë./KP