Xhaka: Nuk i kemi Messin dhe Ronaldon, ne arrijmë vetëm nëse punojmë së bashku

28 shtator 17:25

Granit Xhaka festoi ditëlindjen e tij me fitoren që Kombëtarja e Zvicrës e arriti përballë asaj çeke me rezultat 2-1.

Mesfushori Granit Xhaka është shprehur i kënaqur me fitoren e arritur, por edhe me tri fitoret e arritura radhazi në ndeshjet e fundit të Ligës së Kombeve.

“Ne fituam tri pikë dhe luajtëm tri ndeshjet e fundit ashtu siç e kishim parashikuar të gjithë ciklin. Mund të krenohemi me këto arritje. E dinim që ndeshja me Çekinë do të ishte ndryshe nga ajo me Spanjën, sepse kishim më shumë hapësirë për të luajtur. Ndoshta jo në çdo moment për momentin dukej bukur, por kjo nuk ka rëndësi. Ne treguam se mund të luajmë keq dhe ta sjellim fitoren. Është shumë e vështirë të luash kundër nesh”, ka thënë Xhaka.

Fillimi në Ligën e Kombeve nuk ishte i mirë, sidomos pas tri humbjeve radhazi. “Nëse fitoni ndaj Spanjës dhe Republikës Çeke, ju keni bërë përparim. Ne treguam një reagim pas një fillimi të keq. Në katër ndeshjet e fundit ne treguam se çfarë pritet nga kombëtarja dhe çfarë presim nga vetja. Prandaj unë nuk jam i befasuar që fituam tri ndeshje radhazi”, ka shtuar Xhaka, i cili ka treguar se shumë gjëra kanë ndryshuar në kombëtare në periudhën e kaluar. “Kemi punuar nën drejtimin e Petkoviçit për shtatë vjet. Ai kishte një filozofi të ndryshme nga Yakin. Na duhej kohë, edhe pse u kualifikuam në Kupën e Botës kundër Italisë në vjeshtë. Por edhe atëherë ishim me fat me dy penallti të humbura. Ne luftojmë për secilën ndeshje shumë më tepër se më parë. Ne nuk kemi Messin dhe Ronaldon në ekip, ne arrijmë vetëm nëse punojmë së bashku. Këtë e keni parë në vitet e mëparshme”, ka deklaruar Xhaka.

Zvicra do të luajë në Kupën e Botës me Brazilin, Serbinë dhe Kamerunin. Xhaka thotë se skuadra do të ketë diçka për të treguar në Katar. “Gjashtë pikë nga dy ndeshje na japin shumë besim. Ata që më njohin e dinë se kam pritshmëri të mëdha për veten dhe ekipin. Mund të ëndërrojmë, edhe për diçka vërtet të madhe. Por ne po ecim ngadalë, hap pas hapi”, ka përfunduar Xhaka.

Lajme të sponsorizuara

Të fundit
Shkruan: Astrit Gashi, gazetar - Suedi Edhe fëmijët e kopshtit…