Roberto Mançini është edhe zyrtarisht trajneri i ri i Italisë. Pas zgjidhjes konsensuale të kontratës me skuadrën e Zenitit, pas ndeshjes së fundit të kampionatit rus, trajneri nga Jesi ka zbarkuar në Romë dhe ka firmosur kontratën e re që e lidh me “axurrët” deri në vitin 2020.

Të martën në mesditë, ish-trajneri i Interit do të prezantohet në konferencën për shtyp që do të mbahet në Coverciano, vendgrumbullimin e kombëtares italiane të futbollit.

“Mund të themi se gjithçka është kryer mes Mançinit dhe Italisë. Entuziazmi i tij ka qenë vendimtar në zgjedhjet tonë”, ka thënë përfaqësuesi i Federatës italiane të Futbollit (FIGC), Fabbricini.  Mançini do të debutojë si trajner i Italisë më 28 maj, me miqësoren e programuar në St Gallen të Zvicrës, kundër Arabisë Saudite.

Ndërkohë, më 1 qershor, Italia do të përballet në Nice me Francën, e më pas në “Allianz Stadium” të Torinos do të presë më 4 qershor Holandën.