Zelensky kujton 24 shkurtin e 2022-s: Ishte dita më e gjatë e jetës sonë
Presidenti i Ukrainës, Volodymyr Zelensky, është zotuar të synojë fitore në vitin 2023, sot kur u bë një vjet që Rusia nisi pushtimin e Ukrainës.
Derisa zbardhi agimi në një ditë përkujtimore dhe sfidash, Zelenskyy shkroi në “Twitter” se ukrainasit e kishin dëshmuar veten se ishin “të pathyeshëm” në atë që ai e quajti “një vit dhimbjeje, pikëllimi, besimi dhe uniteti”.
“Ne e dimë se viti 2023 do të jetë viti ynë i fitores”, thuhet në postimin e tij.
Në një video të veçantë, të publikuar në medie dhe të titulluar “viti i pathyeshmërisë”, 45-vjeçari u ul në një tavolinë dhe kujtoi se si iu drejtua ukrainasve një vjet më parë.
“Një vit më parë në këtë ditë, nga i njëjti vend rreth orës shtatë të mëngjesit, ju drejtova me një deklaratë të shkurtër, që zgjati vetëm 67 sekonda”, tha ai në një fjalim 15-minutësh.
“Ne jemi gati për çdo gjë. Do t’i mposhtim të gjithë”.
“Kështu filloi më 24 shkurt 2022. Dita më e gjatë e jetës sonë. Dita më e vështirë në historinë tonë të re”.
“Ne u zgjuam herët dhe nuk kemi fjetur që atëherë”.
Është bërë 1 vit që kur Rusia nisi pushtimin e saj në shkallë të plotë të Ukrainës – lufta më e madhe në tokën evropiane që nga Lufta e Dytë Botërore.
Jetët e Ukrainës kanë ndryshuar përgjithmonë, raporton BBC. Familjet janë shkatërruar, dhjetëra mijëra njerëz janë vrarë dhe ushtarët rusë kanë kryer mizori që kanë tronditur botën.
