Anglia është kualifikuar në gjysmëfinalen e Kupës së Botës 2026 pasi mposhti Norvegjinë me rezultat 2:1 pas vazhdimeve, në një çerekfinale dramatike të zhvilluar në Miami.

Norvegjezët kaluan të parët në epërsi në minutën e 36-të me Andreas Schjelderup, ndërsa Jude Bellingham barazoi në kohën shtesë të pjesës së parë pas një asistimi të Anthony Gordon.

Pjesa e dytë u karakterizua nga raste të shumta dhe momente të diskutueshme, me nga një gol të anuluar për secilën skuadër. Erling Haaland iu mohua goli pas një faulli në ndërtimin e aksionit, ndërsa një gol i Harry Kane u anulua për pozitë jashtë loje.

Heroi i mbrëmjes ishte sërish Bellingham, i cili në fillim të vazhdimeve përfitoi nga një gabim i portierit Ørjan Nyland dhe realizoi golin e dytë, duke vulosur fitoren e “Tre Luanëve”. Në fund, një penallti e akorduar për Anglinë u anulua pas ndërhyrjes së VAR-it.

Me këtë triumf, Anglia siguron një vend në gjysmëfinale, ku do të përballet me fituesin e duelit mes Argjentinës dhe Zvicrës.