Sali Bislimi, në emër të shoqatës “Zëri Perëndimor i Kosovës”, i ka dërguar një letër Amnesty International, përmes së cilës ka kundërshtuar qëndrimin e kësaj organizate lidhur me dënimin e ish-presidentit të Kosovës, Hashim Thaçi.

Në letrën e datës 21 shtator 2026, Bislimi i referohet një artikulli të publikuar më 17 shtator, duke shprehur mospajtim me atë që ai e cilëson si “vlerësim përçarës dhe arbitrar politik dhe ligjor” të çështjes së Thaçit.

Bislimi argumenton se vendimi i gjykatës në Hagë, sipas tij, ngre pikëpyetje për të drejtën e popujve për vetëvendosje dhe për mënyrën se si trajtohen luftërat çlirimtare në të drejtën ndërkombëtare.

Ai thekson se shqiptarët e Kosovës, sipas tij, nuk kishin alternativë tjetër përballë represionit serb përveç përdorimit të armëve dhe përmend edhe ndërhyrjen e NATO-s në vitin 1999.

“Me vendimin e tyre, gjyqtarët në Hagë i kanë rënë kambanës së vdekjes zbatimit të së drejtës së vetëvendosjes së popujve”, thuhet në letrën e Bislimit.

Ai gjithashtu pretendon se rregullat e luftës janë respektuar nga Thaçi dhe se nuk ka pasur shkelje të të drejtave të njeriut, duke kërkuar që këto pretendime të mbështeten me prova materiale.

Në përfundim, Bislimi thotë se, si udhëheqës i “Zërit Perëndimor të Kosovës”, nuk mund të pajtohet me qëndrimin e Amnesty International lidhur me këtë çështje.