Katër kandidatë kanë plotësuar kriteret për pozitën e drejtorit të Spitalit të Përgjithshëm “Prim. Dr. Daut Mustafa” në Prizren. Në garë janë: Afrim Avdaj, Narqize Arënliu Hoxhaj, Sami Ahmetaj dhe Osman Hajdari.

Prezantimi i kandidatëve dhe intervistimi i tyre do të mbahet më 6 gusht 2025 (e mërkurë), në ora 11:00, në ambientet e Dekanatit të Fakultetit të Mjekësisë në Prishtinë.

Kliko linkun:https://www.facebook.com/PrizrenPress/videos/1864936647396265

Afrim Avdaj është një emër i njohur në menaxhimin shëndetësor në Prizren, pasi më herët ka shërbyer si drejtor i këtij spitali.

Në po të njëjtën pozitë ka qenë edhe Narqize Arënliu Hoxhaj, e cila gjithashtu garon për t’u rikthyer në krye të institucionit spitalor.

Ndërkaq, Osman Hajdari, një tjetër kandidat në këtë garë, është liruar së fundi nga pozita e ushtruesit të detyrës së drejtorit të Qendrës Klinike Universitare të Kosovës (QKUK), pas dorëheqjes së dhënë një ditë më parë.

Lista e kandidatëve plotësohet me Sami Ahmetajn, për të cilin pritet të ketë po ashtu një prezantim të detajuar gjatë intervistimit publik.

Pritet që përzgjedhja e drejtorit të ri të spitalit në Prizren të pasohet me një vendimmarrje të rëndësishme për vazhdimësinë dhe zhvillimin e shërbimeve spitalore në rajon, duke marrë parasysh rolin kyç që ka ky institucion në sistemin shëndetësor të Kosovës.