Chelsea pret Barcelonën në “Stamford Bridge” të martën në mbrëmje dhe gjyqtari do të shpresojë për një mbrëmje më pak të ngarkuar sesa takimi mes dy skuadrave më 6 maj 2009.

Slavko Vincic nga Sllovenia është caktuar si gjyqtari kryesor për këtë ndeshje, me bashkatdhetarët e tij Tomaz Klancnik, Andraz Kovacic dhe David Smajc që do ta ndihmojnë.

Chelsea – Barcelona është një ndeshje ikonike në historinë e Ligës së Kampionëve, me të dyja skuadrat të përfshira në shumë përplasje dramatike në kompeticionin më të madh europian për klube.

Njëra prej tyre erdhi në vitin 2009, në një nga dy gjysmëfinalet mes tyre, kur Andres Iniesta shënoi një barazim dramatik në minutat e fundit për të dërguar Barcelonën me 10 lojtarë në finalen e Romës falë golit si mysafir.

Michael Essien kishte hapur rezultatin me një volej të fuqishme në ndeshjen e kthimit, por Chelsea mbeti e tërbuar pasi një sërë pretendimesh për penallti u injoruan nga Tom Henning Ovrebo – përfshirë dyshime të forta për prekje me dorë nga Gerard Pique dhe Samuel Eto’o.

Një Michael Ballack i tërbuar vrapoi pas gjyqtarit norvegjez, ndërsa Didier Drogba bërtiti drejt kamerës së TV: “Është turp! Është një turp i madh!” pas vërshëllimës së fundit, duke marrë një pezullim prej gjashtë ndeshjesh.

Ndërkohë, Jose Bosingwa u pezullua katër ndeshje pasi e kishte quajtur gjyqtarin “hajdut”, pasi trajneri Guus Hiddink tha se skuadra e tij ishte “grabitur”.

Chelsea u gjobit me 85 mijë paund dhe Ovrebo, i cili u shoqërua me polici pas ndeshjes, u përball me kërcënime me vdekje.

Ai vazhdoi të gjykonte në Ligën e Kampionëve, por incidenti famëkeq, së bashku me një gabim në ndeshjen Bayern Munich kundër Fiorentina, çuan përfundimisht në largimin e tij nga arbitrimi në nivelin më të lartë.

Në vend të kësaj, ai gjykoi në Norvegji dhe pasi pësoi një dëmtim në vitin 2012 të cilin u përpoq ta tejkalonte, Ovrebo vendosi të tërhiqej në vitin 2013.

Duke jetuar në Oslo, ai nisi të punonte si psikolog në Shkollën Norvegjeze të Shkencave Sportive, duke u mbështetur në studimet universitare të viteve të mëparshme.

Duke analizuar polemikat e Chelseat në një intervistë të vitit 2022, ai i tha “Daily Mail”: “Nuk mendoj se tifozët e Chelseat kanë të drejtë kur pretendojnë katër apo pesë penallti, por besoj se kushdo që e njeh futbollin dhe rregullat e lojës e di se duhej të jepej një penallti. Këto gjëra ndodhin, sidomos para VAR-it. Ndonjëherë të shpëton një penallti, ndonjëherë një karton i kuq apo një vendim i rëndësishëm. Dhe kushdo që e njeh futbollin e di se duhej të jepej penallti. Le të spekulojnë vetë se cilat situata duhej të ishin penallti. Nuk do t’ju jap një përgjigje të saktë sepse nuk e kam, thjesht kam perceptimin tim”.

Ai shtoi: “Në një ndeshje si ajo, kur ke kaq shumë kërkesa për penallti, ndonjëherë si gjyqtar shqetësohesh të mos mashtrohesh nga skuadra. Kështu që ndoshta kjo ka ndikuar negativisht në perceptimin tim. Mund të jetë kjo. Nuk e di me siguri, vetëm po spekuloj me ju. Mund të jetë një shpjegim, që nuk do të dukesh si gjyqtar që ndikohet për të dhënë penallti. Kështu ndoshta e percepton situatën më rreptë. Nëse do të kisha VAR në atë ndeshje, jam i sigurt se disa vendime do të kishin qenë ndryshe. Por s’mund të rri gjithë kohën duke reflektuar për performancën time për sa kohë që dhashë më të mirën. Mund të mësoj prej saj dhe ky ishte ndoshta aspekti më i rëndësishëm, por nuk mund të pendohem për disa thirrje. Kam bërë gabime edhe në 40 vitet e tjera si gjyqtar dhe s’mund të pendohem për të gjitha”.

Barcelona më pas mposhti Manchester Unitedin 2-0 në një finale pa incidente, ndërsa Chelsea u bë më në fund kampion i Europës në vitin 2012 në Mynih.

Pasi mundi Barcën 3-2 me rezultat të përgjithshëm falë një goli të vonë të Fernando Torres, Drogba shënoi barazimin në minutën e fundit kundër Bayern në stadiumin e tyre dhe më pas realizoi penalltinë e fitores.

Chelsea fitoi kurorën e dytë europiane në vitin 2021 kur mposhti Manchester City me një gol të Kai Havertz në fund të pjesës së parë.

Në rikthimin e tyre këtë sezon në kompeticion, Blutë renditen në vendin e 12-të me dy fitore, një barazim dhe një humbje në katër ndeshjet e para.