Nait Hasani është një nga figurat kryesore të rezistencës kombëtare për çlirimin e Kosovës. Ai është njëri nga themeluesit e Ushtrisë Çlirimtare të Kosovës, deputet në gjashtë legjislatura të kaluara, ndërsa një mandat ka shërbyer si ambasador i Kosovës në Shqipëri. Nait Hasani, që nga vitet ’80, është ballafaquar me regjimin serbo-jugosllav.

Ai është dënuar tri herë me burg për veprimtari armiqësore. Në vitin 1997 u dënua nga regjimi millosheviqian me 20 vjet burgim; është përjetues dhe i plagosur nga ushtria, policia dhe gardianët serbë gjatë masakrës së vitit 1999 ndaj të burgosurve në burgun e Dubravës.

Më 9 shkurt 2025, Hasani kishte garuar në listën zgjedhore të PDK-së për deputet të Kuvendit të Kosovës me numrin 42 dhe kishte arritur t’i grumbullojë 30 mijë vota, duke u renditur në dhjetëshen e parë të PDK-së në Kuvendin e Republikës së Kosovës.

Hasani edhe këtë herë kërkon numrin 42 në listën zgjedhore të PDK-së për zgjedhjet parlamentare që do të mbahen më 28 dhjetor 2025.