Respektimi i gjuhës shqipe, identitetit etnik dhe përfaqësimit të drejtë duhet të zbatohet plotësisht dhe pa asnjë ekuivok, ishte mesazhi i ministres së Jashtme të Shqipërisë, Elisa Spiropali, gjatë vizitës së saj në Shkup.

Ajo ka theksuar se Shqipëria mirëpret dhe inkurajon zbatimin konsekuent të Marrëveshjes së Ohrit, raporton “Alsat-M”.

“Mbi të gjitha, Marrëveshja e Ohrit është standard barazie reale në të drejta, përfaqësim dhe dinjitet. Respektimi i gjuhës shqipe, i identitetit etnik dhe përfaqësimit të drejtë janë detyrime që duhen zbatuar plotësisht dhe pa ekuivokë”, ka thënë Spiropali.

Më tutje, ajo ka thënë se Shqipëria e mbështet integrimin evropian të Maqedonisë së Veriut, jo vetëm si vend fqinj, por edhe për shkak të komunitetit shqiptar, i cili përbën rreth 30 për qind të popullsisë.

Nga ana tjetër, ministri i Jashtëm i Maqedonisë së Veriut, Timço Mucunski, ka paralajmëruar për rrezikun e rritjes së “euro-pesimizmit” në shoqëri.

“Ekziston një grup qytetarësh që besojnë në të ardhmen evropiane, por nuk janë të bindur se Evropa do t’i hapë dyert për ne”, ka thënë ai.