Lionel Messi dhe Cristiano Ronaldo mund të përballen për herë të parë në një ndeshje të Kupës së Botës, nëse Argjentina dhe Portugalia arrijnë deri në finalen e Botërorit 2026.

Rruga e turneut ka krijuar një skenar të jashtëzakonshëm, pasi dy legjendat e futbollit ndodhen në anë të kundërta të tabelës dhe mund të takohen vetëm në ndeshjen për trofe, më 19 korrik në stadiumin MetLife në New Jersey.

Messi dhe Ronaldo kanë dominuar futbollin botëror për më shumë se dy dekada, duke fituar së bashku 13 Topa të Artë dhe duke qenë pjesë e një prej rivaliteteve më të mëdha në historinë e sportit.

Argjentina e mbylli fazën e grupeve me tri fitore, ndërsa Messi vazhdon të shkruajë histori në Botëror. Kampionët në fuqi do të përballen me Cape Verden në fazën e 1/16-ave, ndërsa më tej mund të përballen me ekipe si Egjipti, Australia, Zvicra, Algjeria, Kolumbia ose Gana. Në gjysmëfinale mund të ketë një duel të madh ndaj Brazilit ose Anglisë.

Në anën tjetër, Portugalia e mbylli grupin në vendin e dytë dhe do të përballet me Kroacinë. Nëse kalon më tej, mund të ndeshet me Spanjën dhe më pas me skuadra si SHBA-ja, Bosnja dhe Hercegovina, Belgjika ose Senegali.

Fakti që Portugalia nuk e fitoi grupin bëri që rrugët e Messit dhe Ronaldos të ndahen, duke larguar mundësinë e një përballjeje para finales.

Dy yjet janë përballur 36 herë gjatë karrierës, kryesisht në duelet historike mes Barcelonës dhe Real Madridit. Messi ka regjistruar 16 fitore, ndërsa Ronaldo 11.

Megjithatë, ata nuk janë përballur asnjëherë në një Kupë Bote. Nëse arrijnë deri në finalen e 19 korrikut, një duel Messi–Ronaldo do të ishte një fund i jashtëzakonshëm për rivalitetin që ka përcaktuar një epokë të tërë të futbollit.